Dərmanlarınızın təhlükəsizliyi necə qorunur? – Nazirlik AÇIQLADI
“Səhiyyə Nazirliyi Analitik Ekspertiza Mərkəzində idxal proseduru zamanı dərman vasitələrinin yoxlanılması iki mərhələdə aparılır”.
Musavat.com xəbər verir ki, bu fikirləri “Sağlam radio”nun (93 FM) “Sağlam səhər” efirində Səhiyyə Nazirliyi Analitik Ekspertiza Mərkəzinin Tibb və əczaçılıq vasitələrinin ekspertizası və keyfiyyətinə nəzarət laboratoriyasının müdiri Çingiz Şükürov açıqlayıb.
Onun sözlərinə görə, birinci mərhələdə dərman vasitələrinin idxal sənədləri, qeydiyyat vəsiqələri, qablaşmaları və içlik vərəqələri yoxlanılır, 2-ci mərhələdə isə onların laborator ekspertizası aparılır:
“Laborator analizlər zamanı dərman vasitəsi nümunələrinin keyfiyyət parametrləri yoxlanılır. Dərmanların keyfiyyət göstəricilərinin yoxlanılması Mərkəzin Tibb və əczaçılıq vasitələrinin ekspertizası və keyfiyyətinə nəzarət laboratoriyası tərəfindən həyata keçirilir. Azərbaycan Respublikasına idxal olunan dərman vasitələrinin keyfiyyət parametrləri müxtəlif fiziki, fiziki-kimyəvi və müasir instrumental analiz üsullarından istifadə edilərək yoxlanılır. Ekspertiza yekunlaşdıqdan sonra hər bir dərman vasitəsinin seriyasına uyğun olaraq, idxalçı şirkətə uyğunluq haqqında analiz sertifikatları təqdim edilir. Hər hansı göstəricidə uyğunsuzluq aşkar edildikdə isə, uyğunsuzluq haqqında analiz sertifikatı şirkətə təqdim edilir və həmin məhsulun ölkəyə idxalına icazə verilmir”.
