Qubada İdrisqışlaq-Qasımqışlaq-Xaspolad-Zərqava-Aspərəsti-Çayqışlaq avtomobil yolu yenidən qurulur
ARANTV.AZ xəbər verir ki, Qubada yol infrastrukturu layihələri davam edir. Başlanğıcını M1 Bakı-Quba-Rusiya Federasiyası ilə dövlət sərhədi avtomobil yolundan götürən 33 km-lik İdrisqışlaq-Qasımqışlaq-Xaspolad-Zərqava-Aspərəsti-Çayqışlaq marşrutu üzrə uzanan və 11 yaşayış məntəqəsini birləşdirən avtomobil yolu yol IV texniki dərəcəyə uyğun yenidən qurulur. Artıq işlər yekunlaşmaq üzrədir. Mövcud yararsız asflat-beton örtük 5400 kub.m həcmdə sökülərək daşınıb, yolun torpaq yatağı genişləndirilib. Yararsız qrunt 31 min kub.m həcmdə qazılıb çıxarılıb, qazılan və genişləndirilən hissələrdə yararlı qrunt tökülərək hissə-hissə yayılıb və kipləşdirmə işləri aparılıb. Bu işlərin həcmi 48 min kub.m təşkil edib. Sonra yol əsasının alt layı 20 sm hündürlükdə qum-qırmadaş, əsasın üst layı isə 16 sm hündürlükdə optimal-çınqıl qarışıqlardan istifadə edilməklə təqribən 350 min kv.m sahədə inşası aparılıb. Yol əsasının inşası yekunlaşan ərazilərin isə artıq asfaltlanmasına start verilib. Asfaltlanma işlərinin ardınca növbəti mərhələdə 100 min kv.m sahədə çiyin hissələrin optial-çınqıl materialı ilə bərkidilməsi, 2 min kv.m sahədə isə yol birləşmələrinin təmiri işləri görüləcək. Tikinti norma və standartlarına uyğun olaraq yol boyu suötürücü borular yararsız vəziyyətdə olduğu üçün müxtəlif diametrli 44 ədəd 528 paqon-metr uzunluğunda olan dairəvi dəmir-beton boruların quraşdırılması, boru başlıqlarının monolit-betonla tikintisi işləri aparılıb.
Anar Nəcəfli – AAYDA-nin İctimaiyyətlə əlaqələr şöbəsinin rəisi:
– Sözügedən yolların uzun müddət təmir olunmadan istismarı nəticəsində yolda çökmələr, deformasiyalar əmələ gəlmiş, yolun çınqıl və qara örtüyü tamamilə sıradan çıxmışdı, üstəgəl yol bəzi hissələrdə kənar relyefdən aşağı səviyyədə idi və torpaq yatağının eni standartlara cavab vermirdi. Sadalanan problemlərin, o cümlədən yollar boyu hərəkət nəticəsində yaşanan maneələrin dərhal aradan qaldırılması üçün Azərbaycan Avtomobil Yolları Dövlət Agentliyi marşrut üzrə lazımi sayda qüvvə cəlb etməklə təxirəsalınmaz tədbirlərə start vermişdir.
Layihə çərçivəsində 148 ədəd yol nişanının, 33 ədəd km göstəricisinin və 1350 ədəd siqnal dirəyinin quraşdırılması, hərəkətin normal təşkili üçün 99 km uzunluğunda yolcizgi və yolgöstərici xətlərin, həmçinin 3 min metr yol birləşmələri və piyada keçidlərində piyada zolağının çəkilməsi nəzərdə tutulub. Sözügedən istiqamət üzrə yolların əsaslı şəkildə yenidən qurulmasında məqsəd vətəndaşların rahat gediş-gəlişini təmin etmək, yük və sərnişin daşımasını rahatlaşdır, kənd təsərrüfatının və turizmin inkişafı sürətləndirməkdir.
