Azərbaycanın “Azerspace-2/Intelsat 38” geostasionar peyki Fransa Qvianasındakı kosmodroma çatdırılıb

ARANTV.AZ xəbər verir ki, Azərbaycanın “Azerspace-2/Intelsat 38” geostasionar peyki Fransa Qvianasındakı kosmodroma – Qviana Kosmik Mərkəzinə çatdırılıb. Bu haqda Fransanın “Arianespace” şirkətinin rəhbəri Stefan İsrael “Twitter” hesabında məlumat verib. Peykin sentyabr ayında orbitə buraxılması planlaşdırılır. Azərbaycan peyki orbitə “Ariane 5 ECA” raket daşıyıcısı vasitəsilə göndəriləcək. Peykin xidmət zonasına Avropa, Mərkəzi və Cənubi Asiya, Yaxın Şərq və Afrika ölkələri daxil olacaq. Xatırladaq ki, Azərbaycanın ilk “Azerspace/Africasat-1a” rabitə peyki 2013-cü idə geostasionar orbitə buraxılıb. Bu peykin buraxılması da “Arianespace” şirkəti tərəfindən Kuru kosmodromundan həyata keçirilib. Hazırda orbitdə Azərbaycanın iki peyki fəaliyyət göstərir. “Azerspace-1” Afrika, Mərkəzi Asiya, Yaxın Şərq və Avropaya, eləcə də “Azersky” peyki bütün dünyaya, o cümlədən “Google” kimi iri şirkətə telekommunikasiya xidmətləri göstərir. Ümumilikdə, ilin əvvəlindən “Azərkosmos” ASC tərəfindən 19 ölkəyə peyk telekommunikasiya xidmətləri göstərilib. Bu ilin 6 ayında Azərkosmos peyk və telekommunikasiya xidmətlərindən 12 milyon 700 min dollar məbləğində gəlir qaqzanıb. Bu da qurumun ümumi gəlirlərinin 88 faizini təşkil edir.