Rusiyada hakim “Vahid Rusiya” Dövlət Dumasına seçkilərdə ölkə daxilində böyük üstünlük əldə etsə də, xaricdə yaşayan rusiyalıların səsverməsi tamamilə fərqli mənzərə yaradıb. Xüsusilə 2022-ci ildən sonra rusiyalıların kütləvi köç etdiyi şəhərlərdə hakim partiyanın göstəriciləri ölkə üzrə nəticələrdən dəfələrlə aşağı olub.
ARANTV.AZ xəbər verir ki, “Agentstvo” Rusiya Mərkəzi Seçki Komissiyasının açıqladığı 27 xarici seçki məntəqəsinin nəticələrini təhlil edib.
Onlardan 18-də “Vahid Rusiya” birinci yeri tuta bilməyib. Bəzi şəhərlərdə hakim partiya hətta “Yeni insanlar” və Kommunist Partiyasından sonra üçüncü yerdə qalıb.
Müqayisə xüsusilə diqqətçəkəndir. İlkin ümumrusiya nəticələrində “Vahid Rusiya” təxminən 57,5 faiz səs topladığı halda, Barselonada partiyaya cəmi 5,56 faiz, Haaqada 6,65 faiz, Praqada 7,72 faiz, Lyublyanada 8,23 faiz, Almatıda isə 8,94 faiz səs verilib.
Da Nangda fərq daha böyükdür: “Vahid Rusiya” cəmi 3,94 faiz toplayıb. Burada “Yeni insanlar” 50,81, Kommunist Partiyası isə 31,88 faiz səs əldə edib.
Eyni tendensiya Rusiyadan son illərdə köçün əsas istiqamətlərindən olan Avropa şəhərlərinin əksəriyyətində görünür. Praqada “Yeni insanlar” 54,35 faiz, Kommunist Partiyası 21,52 faiz, “Vahid Rusiya” isə 7,72 faiz səs alıb. Barselonada müvafiq göstəricilər 55,44 – 24,26 – 5,56 faiz, Haaqada isə 57,93 – 22,38 – 6,65 faiz olub.
Vilnüsdə “Yeni insanlar” 33,94 faizlə birinci, kommunistlər 30,28 faizlə ikinci, “Vahid Rusiya” isə 17,43 faizlə üçüncü olub. Vyanada hakim partiyanın göstəricisi 15,67, Helsinkidə 14,21, Varşavada 15,01, Strasburqda 15,72 faiz təşkil edib.
Parisdə də “Yeni insanlar” 42,88 faizlə qalib gəlib. “Vahid Rusiya” 21,59, Kommunist Partiyası isə 18,68 faiz toplayıb.
Maraqlıdır ki, bu mənzərə bütün xarici məntəqələr üçün eyni deyil. “Vahid Rusiya” Bakıda 34,63 faizlə birinci olub. Burada “Yeni insanlar” 26,48, Kommunist Partiyası 21,85 faiz səs toplayıb. Hakim partiya Bişkekdə 35,96, İstanbulda 36,07, Sofiyada 40,80, Riqada 37,15, Kanberrada 39,18, Hanoyda 34,74 faizlə birinci yeri tutub.
Sidneydə isə rəqabət demək olar ki, bərabər olub: “Vahid Rusiya” 31,66, “Yeni insanlar” 31,35 faiz səs əldə edib.
Rəqəmlərin ən maraqlı tərəfi “Vahid Rusiya”nın xaricdə sadəcə daha az səs toplaması deyil. Səsvermənin coğrafiyası ilə siyasi seçim arasında nəzərəçarpacaq fərq yaranıb. 2022-ci ildən sonra rusiyalıların mühüm köç mərkəzlərinə çevrilən Almatı, Barselona, Praqa, Vilnüs, Vyana, Helsinki və digər şəhərlərdə hakim partiyanın nəticəsi xüsusilə aşağıdır. “Agentstvo”nun təhlil etdiyi 27 belə məntəqənin 18-də başqa partiyanın önə çıxması bu fərqi daha aydın göstərir.
Üstəlik, alternativ seçim təsadüfi şəkildə müxtəlif partiyalar arasında bölünməyib. Bu məntəqələrin böyük hissəsində məhz “Yeni insanlar” birinci yerə çıxıb. Müstəqil xarici exit-pollarda da oxşar tendensiya müşahidə olunub: Belqrad, Praqa, Haaqa, Vilnüs, Barselona və bir sıra digər şəhərlərdə “Yeni insanlar” respondentlər arasında lider olub.
Əlbəttə, xaricdə səs verənləri bütün Rusiya cəmiyyətinin reprezentativ modeli saymaq olmaz. Xaricdə yaşayan və ya seçki günü xaricdə olan rusiyalılar sosial vəziyyətinə, yaşına, təhsilinə və siyasi baxışlarına görə ölkə daxilindəki ümumi elektoratdan fərqlənə bilər.
Ancaq məhz buna görə həmin rəqəmlər ayrıca siyasi göstərici kimi maraqlıdır. Ölkə daxilində hakim partiyaya böyük üstünlük verən seçki ilə son illərdə Rusiyadan kənara köçmüş insanların cəmləşdiyi şəhərlərdəki səsvermə arasında çox böyük fərq yaranıb.
