Nar, qoz və bəzi meyvələrin tərkibindəki maddələrin orqanizmdə parçalanması nəticəsində yaranan təbii metabolitin ürək çatışmazlığının müəyyən formasına qarşı təsirli ola biləcəyi aşkarlanıb.
“King’s College London” alimlərinin rəhbərlik etdiyi yeni araşdırmada urolithin A adlı metabolitin qorunmuş ejeksiya fraksiyalı ürək çatışmazlığının (HFpEF) müalicəsində potensial rol oynaya biləcəyi müəyyən edilib.
HFpEF zamanı ürək əzələsi sərtləşir və ürək döyüntüləri arasında qanla lazımi səviyyədə dolmaqda çətinlik çəkir. Bu vəziyyət digər ürək çatışmazlığı formalarından fərqli mexanizmə malikdir və hazırda müalicə imkanları da məhduddur.
Tədqiqat zamanı urolithin A laboratoriya heyvan modellərində sınaqdan keçirilib. Maddənin ürək funksiyasının əsas göstəricilərini 80 faizə qədər yaxşılaşdırdığı, ürək toxumasının boşalmasını dəstəklədiyi, sərtləşməni azaltdığı və ürəyin zərərli şəkildə böyüməsinin qarşısını aldığı müəyyənləşib.
Alimlər daha sonra urolithin A-nı kök hüceyrələrdən yaradılmış insan ürək toxuması üzərində də sınaqdan keçiriblər. Burada da toxumanın boşalmasına müsbət təsir göstərən oxşar nəticə əldə olunub.
Araşdırmada maddənin qan damarları və ürək əzələsinin sağlamlığı üçün mühüm əhəmiyyət daşıyan konkret protein yolunu aktivləşdirdiyi müəyyən edilib.
Alimlərin fikrincə, əldə olunan nəticələr HFpEF üçün bağırsaq mikrobiomunu hədəf alan yeni müalicə üsullarının hazırlanmasına yol aça bilər. Bununla belə, sözügedən təsirin insanlarda müalicə kimi təsdiqlənməsi üçün əlavə klinik araşdırmalara ehtiyac var.
Qeyd edək ki, araşdırmanın nəticələri “Science Advances” jurnalında dərc olunub./yenisabah/
