İndoneziyanın şərqində baş verən 7,7 maqnitudalı güclü zəlzələ böyük dağıntılara səbəb olub. Təbii fəlakət nəticəsində azı 51 nəfər həyatını itirib, 100-dən çox insan yaralanıb.
Zəlzələ Şərqi Nusa Tenqqara əyalətində, Flores adası ətrafında baş verib.
Məlumata görə, təxminən 5 min nəfər təhlükəsiz ərazilərə təxliyə edilib. Sikka rayonunda 3 300-dən çox sakin evlərini tərk edərək sığınacaqlara və idman arenasına yerləşdirilib. Bir çox insan isə yeni təkanlardan qorxaraq gecəni çadırlarda və açıq havada keçirib.
İndoneziyanın səhiyyə nazirinin müavini Benjamin Paulus Oktavianusun sözlərinə görə, zəlzələ nəticəsində 36 nəfər ağır, 77 nəfər isə yüngül xəsarət alıb.
Əsas zəlzələdən sonra bölgədə 341-ə yaxın afterşok qeydə alınıb. Dağıntılar və sürüşmələr bir sıra yolları bağlayıb, xilasetmə işlərini çətinləşdirib. Xilasedicilər torpaq sürüşmələri səbəbindən əlaqəsi kəsilən Maumere şəhərinin bəzi ərazilərinə çata biliblər.
İlkin hesablamalara görə, 1300-dən çox evə ziyan dəyib. Dağıntılar altında insanların qala biləcəyi bildirilir və itkin düşənlərin dəqiq sayı hələ müəyyənləşdirilməyib.
Fəlakətin nəticələrinin aradan qaldırılması üçün bölgəyə 3500-dən çox hərbçi və polis əməkdaşı göndərilib.
Elektrik enerjisinin kəsilməsi də vəziyyəti ağırlaşdırıb. Nəticədə 20 yanacaqdoldurma məntəqəsi fəaliyyətini dayandırıb.
Şərqi Nusa Tenqqara hakimiyyəti yardım və maliyyə resurslarının daha sürətli səfərbər edilməsi üçün əyalətdə fövqəladə vəziyyət elan etməyi nəzərdən keçirir.
Qeyd edək ki, bu, İndoneziyada 2022-ci ildən bəri ən ölümcül zəlzələ hesab olunur. Ölkə Sakit okeanın yüksək seysmik aktivliyi ilə seçilən “Sakit okean Od Halqası” zonasında yerləşir.
