Dünya və Avropa çempionları Qazaxa gedib
Bu ilin oktyabr ayında Macarıstanda keçiriləcək Dünya çempionatında iştirak edəcək Azərbaycan Respublikasının sərbəst güləş üzrə Olimpiya Milli yığma komandası yarışla əlaqədar təlim-məşq toplantıları davam edir.
ARANTV.AZ xəbər verir ki, Dünya və Olimpiya çempionatlarının mükafatçılarından Hacı Əliyevin, Şərif Şərifovun, Cəbrayıl Həsənovun və başqalarının yer aldığı təlim-məşq toplantılarına ümumilikdə 40 idmançı qatılıb.
Federasiyadan bildirilir ki, məşqlərə böyük diqqət var. Hətta Qazax Rayon İcra Hakimiyyətinin başçısı Rəcəb Babaşov da idmançılarla görüşüb. O, təlim-məşq toplantılarının Qazaxda keçirilməsinin, Dünya və Avropa çempionlarının rayona gəlişinin onlar üçün böyük əhəmiyyəti olduğunu vurğulayıb.
Keçirilən təlim-məşqlər barədə məlumat verən Güləş Federasiyasının vitse-prezidenti, sərbəst güləş üzrə Azərbaycan yığma komandasının baş məşqçisi Firdovsi Umudov qeyd edib ki, toplantıları avqustun 25-dək davam edəcək:
“Avqustun 9-dan başlayan təlim-məşq toplantılarında Azərbaycan idmançıları ilə yanaşı, Rusiya və Kanada Milli yığma komandalarının üzvləri də iştirak edir”.
oxu.az
