“Azərbaycanın Vyetnamla münasibətləri onilliklər ərzində formalaşmış tarixi dostluq ənənələrinə əsaslanaraq yeni inkişaf mərhələsinə qədəm qoyur. İki ölkə arasında siyasi dialoqun dərinləşdirilməsi, iqtisadi-ticari əlaqələrin genişləndirilməsi və Azərbaycanın Cənub-Şərqi Asiya istiqamətində mövqeləri möhkəmləndirilməsi baxımından xüsusi əhəmiyyət daşıyır. Bakı ilə Hanoy arasında əməkdaşlıq strateji tərəfdaşlığın konkret istiqamətləri üzrə inkişaf edir. Prezident İlham Əliyevin Vyetnam Xəbər Agentliyinə müsahibəsində də münasibətlərin tarixi və siyasi mahiyyətinə xüsusi toxunulur”.
Bu fikirlərlə Musavat.com-da Milli Məclisin deputatı Könül Nurullayeva çıxış edib.

Onun sözlərinə görə, Azərbaycan-Vyetnam münasibətlərinin təxminən yetmişillik tarixindən bəhs edərkən, dövlət başçımız bildirib ki, məhz 1983-cü il SSRİ Nazirlər Soveti Sədrinin birinci müavini Heydər Əliyevin başçılığı ilə sovet nümayəndə heyəti Vyetnama səfər etdi: “Cənab Prezident xatırlatdı ki, Azərbaycan xalqının Ümummilli Liderinin təşəbbüsü ilə bu səfərin müddəti səkkiz günə qədər uzadıldı və ölkənin əsas regionlarını əhatə etdi, həmin vaxt əldə olunan razılaşmalar Vyetnam iqtisadiyyatının inkişafına güclü təkan verdi və çoxillik əməkdaşlığın istiqamətini müəyyənləşdirdi”.
Münasibətlərin müasir mərhələsində isə əsas siyasi hadisə 2025-ci ilin mayında Vyetnam Kommunist Partiyası Mərkəzi Komitəsinin Baş katibi To Lamın Azərbaycana dövlət səfəri zamanı Strateji tərəfdaşlıq haqqında Birgə Bəyannamənin qəbul edilməsi olub. Bu sənəd ikitərəfli münasibətlərin institusional və siyasi çərçivəsini genişləndirərək əməkdaşlığın yeni sahələrə çıxarılması üçün zəmin yaradıb. Energetika, investisiyalar, müdafiə sənayesi və kibertəhlükəsizlik kimi istiqamətlərin danışıqların gündəliyinə daxil edilməsi tərəfdaşlığın çoxşaxəli xarakter aldığını göstərir.

Prezident İlham Əliyevin qeyd etdiyi kimi, Strateji tərəfdaşlıq haqqında Birgə Bəyannamənin qəbulu “Azərbaycan-Vyetnam əlaqələrini keyfiyyətcə yeni səviyyəyə qaldıran mühüm sənəd” olub. Bu yanaşma Bakı-Hanoy münasibətlərinin yalnız diplomatik təmaslarla məhdudlaşmadığını, konkret iqtisadi və texnoloji layihələrlə zənginləşdirilməsinin nəzərdə tutulduğunu göstərir. İqtisadi əməkdaşlığın genişləndirilməsi də ikitərəfli münasibətlərin əsas prioritetlərindən biridir. Prezidentin müsahibəsində də qeyd olunur ki, 2025-ci ildə iki ölkə arasında ticarət dövriyyəsi 150 milyon ABŞ dollarını ötüb. Bununla belə, mövcud göstərici tərəflərin iqtisadi potensialını tam əks etdirmir. Vyetnamın sənaye istehsalı, elektronika, kənd təsərrüfatı və ixrac yönümlü iqtisadiyyatı, Azərbaycanın isə enerji resursları, nəqliyyat infrastrukturu və regional logistika imkanları qarşılıqlı tamamlayıcı əməkdaşlıq üçün geniş imkanlar yaradır”.
Deputat xüsusi olaraq vurğulayıb ki, energetika sahəsi də münasibətlərin ənənəvi və eyni zamanda perspektivli istiqamətidir: ” 2025-ci ildə imzalanmış Anlaşma Memorandumunun icrası neft-qaz yataqlarının kəşfiyyatı və işlənilməsi, texniki xidmətlər, mütəxəssis hazırlığı sahələrində perspektivlidir.
![]()
Digər mühüm istiqamət nəqliyyat və logistika sahəsidir. Azərbaycan coğrafi mövqeyindən və yaradılmış infrastruktur imkanlarından istifadə edərək Asiya ilə Avropa arasında tranzit əlaqələrinin inkişafında iştirak edir. Orta Dəhliz və Şimal-Cənub nəqliyyat dəhlizi Vyetnam yüklərinin Avropa bazarlarına çatdırılması, eləcə də əks istiqamətdə daşımaların təşkili üçün əlavə imkanlar yarada bilər. Cənab Prezidentin müsahibəsində qeyd etdiyi kimi, Azərbaycanın nəqliyyat-logistika infrastrukturundan bu məqsədlə səmərəli istifadə etmək mümkündür. Bu yanaşma Azərbaycanın tranzit ölkə kimi mövqeyinin genişlənməsi ilə yanaşı, Vyetnamın Avrasiya bazarlarına çıxışının şaxələndirilməsi baxımından da əhəmiyyətlidir. 2026-cı ilin yanvar-sentyabr aylarında Azərbaycan ərazisindən Vyetnamla bağlı tranzit daşımalarının əvvəlki ilin müvafiq dövrü ilə müqayisədə təxminən altı dəfə artaraq 8 min tondan çox olması bu istiqamətdə yaranan dinamikanı nümayiş etdirir. Münasibətlərin inkişafında müdafiə sənayesi, rəqəmsal texnologiyalar və kibertəhlükəsizlik də xüsusi maraq kəsb edir. Müasir beynəlxalq münasibətlər sistemində iqtisadi təhlükəsizlik və texnoloji müstəqillik məsələlərinin aktuallaşdığı bir şəraitdə bu sahələrdə təcrübə mübadiləsi və birgə layihələr tərəfdaşlığı daha da genişləndirir.

Bakı-Hanoy əlaqələrinin mühüm dayaqlarından biri də humanitar və mədəni əməkdaşlıqdır”.
Parlamentari diqqətə çatdırdı ki, sovet dövründə təxminən 5 min Vyetnam vətəndaşının Azərbaycanda təhsil alması iki xalq arasında formalaşmış tarixi bağların miqyasını göstərir: “Heydər Əliyev Fondunun Vyetnamda həyata keçirdiyi təhsil və humanitar təşəbbüslər, universitetlərarası əməkdaşlıq, mədəniyyət günləri və qarşılıqlı səfərlər bu əlaqələrin davamlılığını təmin edir. Bu münasibətlər xalqlar arasında qarşılıqlı etimadın möhkəmləndirilməsi müstəvisində də inkişaf edir. Prezident İlham Əliyevin müsahibəsində səsləndirdiyi “Humanitar əməkdaşlıq xalqlarımızı və dövlətlərimizi birləşdirən möhkəm körpü rolunu oynayır” fikri bu əlaqələrin mahiyyətini ifadə edir”.
Cavanşir Abbaslı
Musavat.com

