Silahlı Qüvvələr Günü ilk dəfə bütün ölkə ərazisində qeyd edilir
Yaşadığımız çağdaş tarix sübut etdi ki, dövlət və ordu güclü olanda ədalət bərpa olunur. Prezident İlham Əliyevin Silahlı Qüvvələrimizin inkişafına xüsusi diqqət və qayğısı sayəsində Azərbaycan Ordusu dünyanın ən güclü 50 ordusu sırasında daxil oldu. Belə ki, 2016-cı ilin Aprel döyüşləri, 2018-ci ildə keçirilmiş Günnüt əməliyyatı ordumuzun gücünün qismən nümayişi və düşmənlərimizə çox ciddi mesaj idi. Məhz həmin döyüşlər zamanı biz ordumuzun nəyə qadir olduğunu göstərməklə düşmənə ərazilərimizi tərk etməyin zamanı gəldiyini bildirdik. Amma düşmən bu mesajdan nəticə çıxarmadı və 44 günlük Vətən müharibəsi başladı. Düşmənin 30 ilədək işğal altında saxlayaraq müdafiə xəttlərini qurub möhkəmləndirdiyi əraziləri ordumuz cəmi 44 günə azad etdi. Şübhəsiz ki, Azərbaycan xalqını bütün dünyaya qalib millət kimi təqdim edən gənclər Vətən müharibəsində və antiterror tədbirlərində misli görünməmiş qəhrəmanlıq və igidlik nümunəsi göstərdilər.
“Gənclər Mərkəzi” İctimai Birliyinin sədri Kənan Qubadzadə “İki sahil”ə açıqlamasında gənclərin ordu sıralarında göstərdikləri şücaətdən bəhs edərək bildirdi ki, onların bu qəhrəmanlığı çağdaş tariximizin Zəfər salnaməsinə qızıl hərflərlə yazılıb: “26 İyun Silahlı Qüvvələrin Günü ənənəsi 1918-ci ildən xalqımıza qoyulmuş bir mirasdır. Azərbaycan dövləti gücləndiyinə görə 1990-cı illərin əvvəllərində yaşadığı çətin dövrləri uğurla addımlaya bildi. Təbii ki, bu uğurların təməlində Ulu Öndər Heydər Əliyevin əsasını qoyduğu siyasi kurs dayanır. 1993-cü ildə xalqın təkidli tələbi ilə Ümummilli Lider Heydər Əliyevin siyasi hakimiyyətə qayıdışından sonra Azərbaycan Silahlı Qüvvələri güclü və qüdətli orduya çevrildi. Həmin dövrdə Cəmşid Naxçıvanski adına Hərbi Liseyin yaradılması, sonra Ali Hərbi Məktəbin əsasının qoyulması, Azərbaycan Ordusunda Ulu Öndərin birbaşa diqqət və qayğısı idi. Daha sonra bu siyasət Prezident İlham Əliyev tərəfindən uğurla davam etdirildi. Ordu quruculuğu daha geniş vüsət aldı. Yeni hərbi-texniki vasitələr ordumuzun arsenalına daxil edildi. Beləliklə Azərbaycan Silahlı Qüvvələri dünyanın ən güclü orduları sırasında yer aldı”.
Kənan Qubadzadə qeyd etdi ki, ordumuz öz gücünü bir daha 2020-ci ildə başlanan, qalibiyyət Zəfəri ilə müşahidə olunan 44 günlük Vətən müharibəsində özünü göstərdi: “Həmin dövrdə Azərbaycan Ordusunun gücünü dünya dövlətləri görməyə başladı. Prezident, Ali Baş Komandan İlham Əliyevin rəhbərliyi, ordumuzun gücü və qüdrəti sayəsində torpaqlarımız işğaldan azad olundu. Heç də təsadüfi deyil ki, Azərbaycan Silahlı Qüvvələri rəşadətli ordudur. Vətən müharibəsi zamanı Ali Baş Komandan bütün çıxışlarında bildirdi ki, bizim ordunun gücü və qüdrəti, xüsusən də gənclərimizin rolu böyükdür. Çünki bilirik ki, ordumuzun şəxsi heyəti əsasən gənclərdən ibarətdir. Onların şücaəti və qəhrəmanlığı sayəsində biz bu gün azad, müstəqil və bütöv Azərbaycanda yaşayırıq. Müzəffər Ali Baş Komandanın düzgün strategiyası, şəhidlərimizin və qazilərimizin qanı-canı bahasına ölkəmizin suverenliyi və ərazi bütövlüyü tam təmin edildi. Bunun üçün biz şəhidlərimizin ruhu qarşısında baş əyir, qazilərimizə Allahdan şəfa diləyirik”.
İctimai Birliyinin sədri vurğuladı ki, 2020-2023-cü illərdə aparılan hərbi əməliyyatlar zamanı gənclərimizin ərazi bütövlüyümüzün bərqərar olunmasında rolu böyükdür: “Postmüharibə dönəmində də Prezident İlham Əliyevin və Birinci vitse-prezident, Heydər Əliyev Fondunun prezidenti Mehriban Əliyevanın şəhid ailələri və qaziləri diqqət və qayğısı göz önündədir. Azərbaycanda dövlət tərəfindən cəmiyyətin həssas qruplarına göstərilən qayğı başqa dövlətlərə nümunə ola biləcək bir səviyyədədir. Şəhid ailələri və qazilər bizim baş tacımızdır. Onu da demək olar ki, Vətən müharibəsində ön cəbhədə əsgərlərimizlə bərabər, arxa cəbhədə də cəmiyyətimiz, gənclərimiz hər an Ali Baş Komandanın tapşırığını gözləyirdi. Hazırda ölkə gəncliyi sağlam əqidəli və düşüncəli, cəsarətlidir. Gənclərimiz Prezident İlham Əliyevin yürütdüyü siyasəti yüksək səviyyədə dəstəkləyir. Biz inanırıq ki, yaxın gələcəkdə tarixi torpaqlarımız olan Qərbi Azərbaycana qayıdışın şahidi olacağıq”.
26 İyun – Azərbaycan Respublikasının Silahlı Qüvvələr Günü münasibətilə xalqımızı təbrik edir, rəşadətli ordumuza Vətən keşiyində ayıq-sayıq dayanmaqda uğurlar arzulayırıq.
Cavid Əkbər, “İki sahil”
