“Nə qədər üzvümüzün üzvlük haqqı üzrə borclu qaldığını hazırda deyə bilmirik. Bununla bağlı əlimizdə statistik rəqəm yoxdur. Lakin üzvlük haqqını vaxtında ödəməyənlərə mütəmadi olaraq xəbərdarlıq edilir”.
Bunu Musavat.com-a açıqlamasında Azərbaycan Yazıçılar Birliyinin (AYB) mətbuat katibi Xəyal Rza deyib.
O bildirib ki, üzvlük haqqı üzrə borcu olan şəxslərlə bağlı gələn həftə qərar qəbul ediləcək. Məsələ AYB Katibliyinin növbəti iclasında müzakirəyə çıxarılacaq:
“Katibliyin gələn həftə keçiriləcək iclasında bu məsələ ilə bağlı qərar veriləcək. Hesabat hazırlanacaq və üzvlük haqqını ödəməyənlərin olub-olmadığı dəqiqləşdiriləcək. Amma bu, qəti qərardır: üzvlük haqqını ödəməyənlər AYB-nin üzvü kimi qala bilməzlər”.
Xatırladaq ki, bir müddət əvvəl Azərbaycan Yazıçılar Birliyi üzvlük haqqını ödəməyən bir qrup şair və yazıçını qurumdan xaric edib. AYB-də illik üzvlük haqqı 15 manat təşkil edir.
Şahanə Rəhimli
Musavat.com
