«Nəzarətçi»lərin özlərinə nəzarət lazımdır
Bakı Metropoliteninin 20 Yanvar stansiyasının çıxışında yerləşən, hamının «Velotrek» adlandırdığı ərazidə ictimai nəqliyyatın hərəkəti ilə bağlı yaranan vəziyyət sərnişinləri narahat edir
Son illərdə Bakı da daxil olmaqla respublikamızın bütün bölgələrində yol-nəqliyyat infrastrukturunun bərpası, yenidən qurulması, prospektlərin genişləndirilməsi, keçidlərin, körpülərin salınması paytaxtımıza xüsusi yaraşıq verməklə piyadaların hərəkətini də asanlaşdırıb, küçələrdə müşahidə olunan sıxlıq nisbətən aradan qaldırılıb. Əvvəlki illərdən fərqli olaraq yollarda görünən rahat, konforlu , iritutumlu avtobusların marşrutlara çıxarılması ilə paytaxt və Bakıətrafı ərazilərdə yaşayan əhaliyə göstərilən nəqliyyat xidmətinin səviyyəsi yüksəlib. Bütün respublikalarda həmişə mövcud olan nəqliyyat problemlərinin ölkəmizdə də həlli üçün dövlətin göstərdiyi diqqət, həyata keçirilən islahatların səmərəsini gündəlik həyatımızda hiss edirik. Yaranmış qlobal problemlərin tədricən həll olunması, müxtəlif marşrutlar üzrə işləyən avtobusların sayının artırılması, köhnə nəqliyyat vasitələrinin yeniləri ilə əvəz edilməsi, marşrutların hərəkət istiqamətlərinin uzadılması ilə bu sahədəki giley-güzarların da sayı azalıb. Bakı Nəqliyyat Agentliyinin fəaliyyətə başlaması ilə bu sahəyə nəzarət gücləndirilmiş, yaranan çətinliklərin aradan qaldırılması ilə əhaliyə göstərilən nəqliyyat xidmətinin səviyyəsi yüksəldilmişdir.
Təbii ki, hər sahədə olduğu kimi nəqliyyatın intensiv hərəkətinin tənzimlənməsində boşluq yaradan obyektiv və subyektiv səbəblər yox deyildir. İnsanları narahat edən çatışmazlıqların qısa müddətdə aradan qaldırılması ilə bu kimi hallara da ciddi yanaşılır. Çox təəssüf ki, dövlətin daim diqqət göstərdiyi, paytaxt sakinlərinin, dünyanın müxtəlif ölkələrindən ölkəmizə gələn qonaqların rahatlığının təminatı üçün görülən işlərə kölgə salan məqamlar da vardır.
… Paytaxtımızın ən çox əhali yaşayan, yüzlərlə marşrut avtobuslarının hərəkətdə olduğu Yasamal rayonu ərazisində yerləşən Bakı Metropoliteninin 20 Yanvar stansiyasının ərazisində yerləşən və insanların «Velotrek» kimi tanıdığı ərazidə yaranan neqativ hallar narahatlıq doğurur. Bu da Bakının müxtəlif istiqamətlərinə getmək üçün avtobus gözləyən sərnişinləri incidir. Bu narazılığa səbəb də həmin ərazidə marşrut avtobuslarının hərəkətinə nəzarət edən sözdə nəzarətçilərin öz işlərinə qeyri- ciddi yanaşmalarıdır. Başqa sözlə deyilsə, həmin nəzarətçilərin fəaliyyətinə ciddi nəzarət lazımdır. Səhər və axşam saatlarında, insanların çoxluq təşkil etdiyi müddətdə burada müşahidə olunan qarışıqlıq piyadaların hərəkəti üçün ciddi maneələr törədir.
20 Yanvar metrostansiyasının pillələrindən qalxmamış respublikanın müxtəlif rayonlarına sərnişin aparan sürücülərin qulaq batıran «İmişli, Salyan, Sabirabad, Masallı, Cəlilabad…» çağırışlarını eşidirsən. Bir balaca irəliləyən kimi Sumqayıta gedən avtobusları gözləyən sərnişinlərin, müştəri yığan taksilərin yaratdığı qələbəlik piyadalar üçün çətinlik yaradır. Bir balaca irəliləyib avtobus dayanacağına çatanda isə başqa mənzərənin şahidi olursan. Biri-birinin ardınca gələn avtobus sürücüləri taksilərin yaratdığı basırıq üzündən dayanmağa yer tapmırlar. Gözlədiyi avtobusa minməyə tələsən sərnişinlərin qaça-qaçı, basabası o məqamda başlayır. Ən acınacaqlısı da odur ki, sərnişinləri belə nəzərə almayan, «Koroğlu», «Piramida», «Xalqlar» deyə çağıraraq bir manata müştəri axtaran taksi sürücüləri nə avtobuslara yol verir, nə də gözlədiyi nəqliyyat vasitəsinə minmək üçün tələsən sərnişinlərə. Çox vaxt yaranan bu cür problem səbəbindən istədiyi avtobusa minməyə macal tapmayanlar əlavə vaxt sərf edib növbəti nəqliyyat vasitəsini gözləməyə məcbur olurlar. Günəşin istisindən daldalanmağa yer, üstəlik avtobusa minməyə macal tapmayan, üzərlərinə sürülən taksilərdən qaçmağa məcbur qalan sərnişinlərin keçirdikləri əsəbi təsəvvür etmək çətindir.
Soruşa bilərsiniz ki, avtobus dayanacaqlarında bütün günü nəqliyatı tənzimləyən nəzarətçilər olur. Əsl mərəkəni yaradanlar həmin nəzarətçilərdir. Marşrut avtobuslarının hərəkətlərini diqqətdə saxlamaqdan çox dayanacaqda qeyri-qanuni parklayan taksilərə, kiçik həcmli avtobuslara sərnişin toplamaqla məşğul olan «nəzarətçilərin» özlərinə nəzarət lazımdır. Bu canfəşanlığın səbəbini öyrənmək isə aid təşkilatın üzərinə düşür. Onu da qeyd edim ki, təsadüfən yol polisi əməkdaşları, BNA-nın əlavə nəzarətçiləri ərazidə olanda nisbətən normal şərait yaranır.
Müşahidə etdiyim bu vəziyyəti bir həmkar kimi BNA-nın mətbuat xidmətinin rəhbəri Mais Ağayevin diqqətinə çatdırmaq istədim. Bir neçə zəngdən sonra telefona cavab verən mətbuat xidmətinin rəhbəri hazırda işi olduğunu, sonra özünün zəng edəcəyini bildirərək telefonunu söndürdü. Qarşı tərəfdən cavab gəlmədiyini gördüyüm üçün məcbur qalıb sözlərimi qəzetimiz vasitəsilə çatdırmağı məsləhət bildim. Deyilənlərin şahidi olmaq, yaranan mənzərəni kənardan izləmək və məsələyə münasibətlərini əməli işləri ilə bildirmək isə aid təşkilatın rəsmilərinin üzərinə düşür.
