Ermənistanın sülh sazişi imzalamaqdan imtina etməsi onun əleyhinə işləyir- Ramin Məmmədov
Ermənistan cəmiyyətinə təlqin olunan “yenilməz erməni ordusu” mifini Azərbaycan Ordusu 44 gün ərzində məhv etdi
“Bu gün dünyada gedən proseslər sülhün və təhlükəsizliyin nə qədər həyati əhəmiyyət kəsb etdiyini bir daha təsdiqləyir. Bu mənada hesab edirəm ki, Ermənistan indiki şəraitdə müharibədən sonra yaranmış situasiyanın şərtlərini nəzərə almağa məcburdur.”
Bu sözləri Milli Məclisin deputatı Ramin Məmmədov “İki sahil”ə açıqlamasında deyib.
R.Məmmədov bildirib ki, Azərbaycanla Ermənistan arasında sülh müqaviləsinin imzalanması nəinki iki ölkənin xalqlarının maraqlarına cavab verir, eyni zamanda, regionun gələcəyi üçün yeni perspektivlər açır.
Deputat qeyd edib ki, Azərbaycan Cənubi Qafqazda yeni əməkdaşlıq formatı təklif edib: “Bu təşəbbüsün reallaşdırılması üçün bütün imkanlardan istifadə etmək vacibdir. Ermənistanın sülh sazişini imzalamaqdan imtina etməsi, kommunikasiyaların açılmasını gecikdirmək cəhdləri zaman itkisindən başqa bir şey deyil. İndiki halda isə zaman daha çox Ermənistanın əleyhinə işləyir. Çünki bu ölkənin iqtisadi tənəzzüldən xilas olması üçün kommunikasiyaların açılmasına, nəqliyyat əlaqələrinin bərpasına başqa ölkələrdən daha çox ehtiyacı var.”
Millət vəkilinin fikrincə, Azərbaycan-Ermənistan sərhədinin müxtəlif istiqamətlərində, eyni zamanda, Rusiya sülhməramlılarının müvəqqəti yerləşdirildiyi Azərbaycan ərazilərində atəşkəsin pozulması Ermənistanın müharibənin faktiki nəticələrini hələ də düzgün qiymətləndirə bilmədiyini göstərir: “Hər bir müharibə ölkənin yalnız hərbi qüdrətini deyil, eyni zamanda, onun iqtisadi imkanlarını, cəmiyyət və dövlət arasında qarşılıqlı anlaşmanın, etimadın miqyasını ifadə edir. Bu baxımdan, Ermənistanın indi hansı durumda olduğunu izah etmək o qədər də mürəkkəb məsələ deyil. Reallıqlar göz önündədir. Ona görə də Ermənistanın siyasi qüvvələri, o cümlədən mövcud hakimiyyəti cəmiyyəti daha çox sülhə hazırlamalıdır, nəinki müharibəyə. Ancaq bəzi hallarda biz bunun əksi olan təşəbbüslər, açıqlamalar müşahidə edirik.”
Ramin Məmmədov bildirib ki, 30 il ərzində Ermənistan cəmiyyətinə təlqin olunan “yenilməz erməni ordusu” mifini Azərbaycan Ordusu 44 gün ərzində tamamilə məhv etdi. “Qəhrəman erməni əsgəri, erməni sərkərdələri” kimi tezislərin yalan olduğu sübut olundu: “Hesab edirəm ki, Ermənistanda siyasi dairələr, media, ictimai rəyə təsir imkanları olan qüvvələr yeni vəziyyəti nəzərə almalıdırlar. Ermənistan cəmiyyətinin indi daha çox həqiqətləri bilməyə, öz ölkəsinin imkanlarını, hərbi və iqtisadi potensialının miqyasını düzgün qiymətləndirməyə ehtiyacı var”.
Deputat qeyd edib ki, Azərbaycan Ordusu 44 günlük müharibədə Ermənistana ciddi bir dərs verib. Bu dərsdən doğru nəticə çıxarmadan, əməkdaşlıq və inkişaf üçün açılan yeni imkanları praqmatik bir formada təhlil etmədən Ermənistanın gələcəyi haqqında doğru qərarlar qəbul etmək mümkün olmayacaq.
