“Sağlam gələcək naminə narkotiklərə yox deyək!”
Yardımlı şəhər 1 saylı tam orta məktəbdə keçirilən tədbirin təşkilatçısı Rayon Polis Şöbəsi idi.
“Sağlam gələcək naminə narkotiklərə yox deyək!” mövzusunda olan maarifləndirici tədbirdə rayon Polis Şöbəsinin rəisi, polis polkovniki Arif Babayev “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019–2024-cü illər üçün Dövlət Proqramı” nın əhəmiyyətindən danışaraq dedi ki, narkomaniyanın cəmiyyətə vurduğu zərərlər olduqca ağır nəticələr verir .
Bəli, ölkəmizin işıqlı və gözəl gələcəyi məhz sağlam, savadlı gənclikdən asılıdır. Hər bir yeniyetmə və gənc bunu ağıllı şəkildə dərk etməklə, bu zərərli vərdişlərdən uzaq durmalı, diqqətini təhsilə, idmana verməlidir. Bir də indiki dövrdə belə görüşlərin təşkili olduqca vacibdir. Məqsəd yeniyetmə və gənclərə narkomaniyanın, eləcə digər insan həyatına yaraşmayan vərdişlərin mənfi nəticələri, doğurduğu fəsadlar barədə məlumat vermək və onları belə neqativ əməllərdən çəkindirməkdir.
Sonra çıxış edən Rayon Təhsil Şöbəsinin, Gənclər və İdman İdarəsinin əməkdaşları maarifləndirici tədbirin təşkilini yüksək razılıqla qarşıladılar, şagirdləri isə belə həssas mövzulara diqqətlə yanaşmağa, verilən dəyərli tövsiyələrə ciddi əməl etməyə çağırdılar.
Tədbir narkotik vasitələrin cəmiyyətə və insan orqanizminə vurduğu zərərli təsirləri əks etdirən video-çarxın nümayişi ilə tamamlandı.
Zəfər Orucoğlu,
Azərbaycan Jurnalistlər Birliyinin üzvü
