Tarix yazan Vətən sevdalısı
Ləyaqət və şərəf işimiz olan Azərbaycanın suverenliyi, ərazi bütövlüyü uğrunda gedən mübarizədə rəşadət göstərən ordumuzun əsgər və zabitləri İkinci Qarabağ müharibəsində 44 günə canları, qanları bahasına 30 il düşmənin əsarətində qalan Vətən torpaqlarını azad etdilər. Qazanılan bu şanlı qələbədə xalqımızın igid oğlanları sırasında qəhrəmanlıq rəmzinə çevrilmiş, adı dillərdə dastan olmuş Samiq Rizvan oğlu Rəhimov da var. Astara rayonu, Səncərədi kəndində dünyaya gələn Samiq Azərbaycanın müqəddəs guşəsi olan Qarabağın yada yurd olmağına heç cür dözə bilmirdi. O, müqəddəs şərəfli bir yolda-Vətən, torpaq uğrunda şəhid olanda ömrünün 30 ilini yaşayırdı.
Bütöv bir millətin ürəyinə qəhrəmanlıq toxumu səpən Samiq Rəhimov özünü bilən gündən Vətəninə bağlanır. Xalqına gərək olmaq, elinə fayda vermək onun həyat amalına çevrilir. Samiq 2010-cu ildə qəlbində Vətənə məhəbbət, yağıya nifrət həqiqi hərbi xidmətə yollanır. İstəyi tezliklə Vətən torpaqlarını mənfur düşmən tapdağından azad görmək olur. Samiq ilk gündən nümunəvi xidməti ilə seçilir. Son dərəcə mərd, cəsur, ağıllı bir gənc olmaqla zabitlərin, əsgərlərin hörmətini qazanır. Əsgəri borcunu ləyaqətlə yerinə yetirən Samiqin düşməndən qisas almaq arzusu onu ömürlük hərbiyə bağlayır.
Vətənin qəhrəman oğlu 2016-ci ilin Aprel döyüşlərində düşmənə öz gücünü göstərə bilir. Sözün həqiqi mənasında erməni dığalarına qan uddurur, onlarla canlı qüvvəsini, neçə-neçə hərbi texnikasını məhv edir. Baş çavuş rütbəsini alır.
Samiq Vətən müharibəsi başlanan günü odun-alovun içinə atılır. Və düşməndən sona qədər döyüşərək qisas alacağına and içir. Belə də olur. Füzuli, Cəbrayıl uğrunda qanlı döyüşlərində yüksək şəxsi rəşadət və şücaət göstərir. Samiq 25 oktyabrda Qubadlıda gedən ağır, qeyri-bərabər müharibədə şəhid olur. Yolunda qan tökdüyü torpağı Vətən edir, həm də şərəfli ölümü ilə özünə milyonların ürəyində əbədi məkan qurur. Dövlət tərəfindən isə “Vətən uğrunda”, “Cəsur döyüşçü”, Füzulinin, Cəbrayılın azad olmasına görə medallara layiq görülür.
Vətəni müharibəsinin qalib şəhidi özündən sonra xalqına, elinə üç övlad yadigar qoyubdur. Övladları onunla qürur duyur, adını uca tuturlar.
Zəfər Orucoğlu,
Azərbaycan Jurnalistlər Birliyinin üzvü
