Azərbaycan dövləti qlobal humanitar missiyasını uğurla icra edir
Bildiyimiz kimi iki ildən artıq bir müddətdir ki, koronavirus infeksiyası arzu etmədiyimiz halda həyatımızın bir hissəsinə çevrilib. Hər kəsi narahat edən, təhlükəli pandemiya halına keçən bu xəstəlik bütün dünyanı çətin sınaq qarşısında qoymuş, dövlətlər COVİD-19 ilə mübarizədə müxtəlif vasitələrdən istifadə etmişlər.
Belə bir məqamda Azərbaycan dövləti vətəndaşının sağlamlığı və təhlükəsizliyi naminə qabaqlayıcı tədbirlər görən, təxirəsalınmaz addımlar atan nümunəvi dövlətlərdən oldu. Hər bir vətəndaşın Prezidenti olduğunu bir daha təsdiqləyən ölkə başçımız cənab İlham Əliyev pandemiyanın iqtisadiyyata mənfi təsirinin azaldılması məqsədilə sistemli tədbirlər görmüş, müxtəlif sosial paketlərin reallaşdırılması təmin edilmişdir. Pandemiya ilə mübarizə dönəmində yeni xəstəxana binaları tikilməsi, modul tipli xəstəxanalar quraşdırılması, xaricdən müasir tibbi avadanlıqların alınması, xəstəliklə mübarizədə xüsusi təcrübəyə malik həkimlərin ölkəmizə gətirilməsi təmin olunmuşdur. Qısa zaman ərzində 13 modul tipli və 1 daimi xəstəxana inşa edilmişdir. Ölkədə COVID xəstələrinin müalicəsi üçün müəyyən edilmiş xəstəxana çarpayılarının toplam sayı 10 mindən artıqdır. Dövlət başçısı tərəfindən virusun yayılmasının qarşısının alınmasında vacib predmet olan tibbi maskaların təminatı məqsədilə yerli istehsal müəssisəsi açılmış və bütün istiqamətdə operativ tədbirlər həyata keçirilmişdir.
Hər zaman olduğu kimi ölkəmiz pandemiya ilə mübarizədə də həmrəyliyin, əməkdaşlığın, qlobal təşəbbüslərin təşəbbüskarı olub.
Bəllidir ki, COVID-19 ilə qlobal mübarizə, onun nəzarət altında saxlanılması və yayılmasının qarşısının alınması, habelə dövlətlərə dəstəyin verilməsi üzrə səylərin əlaqələndirilməsində BMT sisteminin fundamental rolu var. Ümumdünya Səhiyyə Təşkilatının səyləri əvəzolunmazdır. Pandemiyanın başladığı dövrdən Qoşulmama Hərəkatı multilateralizm, əməkdaşlıq və həmrəylik ruhunda geniş beynəlxalq ictimaiyyətin səylərini fəal şəkildə səfərbər edərək, pandemiya ilə mübarizə və onun mənfi nəticələrinin aradan qaldırılması baxımından bir sıra uğurlu təşəbbüslər irəli sürmüşdür. 2020-ci ilin dekabrında BMT Baş Assambleyasının COVID-19 pandemiyası ilə mübarizəyə həsr edilmiş Xüsusi Sessiyasının keçirilməsi, habelə ötən ilin mart və dekabr aylarında İnsan Hüquqları Şurası və Baş Assambleya tərəfindən qəbul edilmiş “COVID-19 pandemiyası ilə mübarizədə bütün ölkələr üçün peyvəndlərə bərabər, məqbul qiymətə, vaxtında və universal əlçatanlığın təmin edilməsi”nə dair qətnamələr Qoşulmama Hərəkatına üzv dövlətlər adından irəli sürülmüşdür.
COVID-19 pandemiyası kimi qlobal fövqəladə vəziyyət qlobal yanaşma tələb edir. Lakin az və orta gəlirli ölkələrdə peyvəndlərin tədarükünün aşağı səviyyədə olması bu baxımdan hələ də çox işlərin görülməli olduğunu göstərir.COVID-19 peyvəndlərinin bölgüsü baxımından inkişaf etməkdə olan ölkələrlə inkişaf etmiş ölkələr arasında qeyri-bərabərlik beynəlxalq ictimaiyyətin qısa zamanda pandemiyanın tamamilə aradan qaldırılmasına nail olmasının qarşısını alır. Sözügedən amil Dayanıqlı İnkişaf üzrə 2030-cu il Gündəliyinin reallaşdırılmasına mane olur.
Azərbaycan COVID-19 peyvəndlərini ianə edən ölkələrin səylərini alqışlayır və bütün dövlətlərə buna ehtiyacı olan az və orta gəlirli ölkələrlə peyvənd dozalarını bölüşməyi fəal şəkildə təşviq edir. Bu kontekstdə Azərbaycan bütün ölkələr üçün COVID-19 peyvəndlərinin məqbul qiymətə, bərabər, universal və vaxtında əlçatanlığın təmin olunmasına xidmət edən COVAX Mexanizmi, COVAX Öncədən Bazar Öhdəliyi, COVAX Öncədən Bazar Öhdəliyi Forumu və digər aidiyyəti konstruktiv təşəbbüsləri yüksək qiymətləndirir və dəstəkləyir. Bundan əlavə, Azərbaycan BMT sülhməramlılarının mürəkkəb vəziyyətlə üzləşdiyini nəzərə alaraq, BMT-nin sülhməramlı əməliyyatlarına COVID-19 əleyhinə peyvənd ianə edən ölkələrin səylərini alqışlayır.
Bütün ölkələrin, beynəlxalq təşkilatların və aidiyyəti tərəfdaşların milli və regional hüquqi çərçivəyə uyğun olaraq peyvənd istehsalı, paylanılması və ədalətli qiymət qoyulması məsələlərində şəffaflıqla bağlı öhdəlik götürmələri vacibdir. COVID-19 əleyhinə peyvəndlərin məqbul qiymətə, vaxtında, bərabər və universal əlçatanlığına mane ola biləcək möhtəkirliyin, lazımsız ixrac nəzarətinin və lüzumsuz artıq tədarükün qarşısının alınması ilə bağlı ölkələr tərəfindən təcili addımların atılması eyni dərəcədə əhəmiyyətlidir.
Qoşulmama Hərəkatı pandemiyanın tezliklə aradan qaldırılması və effektiv bərpa prosesinə imkan yaradacaq beynəlxalq həmrəyliyin gücləndirilməsi üçün fəal şəkildə səylərini davam etdirməyə hazırdır. Bu mənada Qoşulmama Hərəkatı post-COVID-19 dövrünün bərpa ehtiyacları ilə bağlı nəticəyönümlü təşəbbüslərlə çıxış edəcək.
Azərbaycan pandemiya, “peyvənd millətçiliyi” və peyvəndlərdən istifadə ilə bağlı inkişaf etmiş və inkişaf etməkdə olan ölkələr arasında qeyri-bərabərliyə qarşı beynəlxalq həmrəyliyin gücləndirilməsi istiqamətində vacib qlobal təşəbbüslərlə çıxış edib. BMT Baş Assambleyasının Xüsusi Sessiyası, peyvəndlərdən bərabər və universal istifadənin təmin edilməsinə dair qətnamələr bunun bariz nümunəsidir.
Azərbaycan dövləti qlobal humanitar missiyasını uğurla icra edir. Həmrəylik əlaməti olaraq, koronavirusla mübarizəni dəstəkləmək məqsədilə Azərbaycan birbaşa və ya Ümumdünya Səhiyyə Təşkilatı vasitəsilə 80-ə qədər ölkəyə maliyyə və humanitar yardımı etmişdir. Bununla yanaşı, 5 ölkəyə peyvənd ianəsi edilib və bu iş davam etdiriləcək. Hazırda Qoşulmama Hərəkatına üzv olan 14 ölkəyə təqribən bir milyon doza peyvəndin ianə edilməsi prosesi davam edir.
Azərbaycan COVID-19 pandemiyasının nəzarətdə saxlanılması üçün təsirli və adekvat tədbirlərin həyata keçirilməsini davam etdirir. Peyvəndlənmə kampaniyasına 2021-ci ilin yanvarında başlamışıq. Bu günədək ölkədə yetkin əhalinin 68 faizinə peyvəndin hər iki dozası vurulub. COVID-dən əziyyət çəkmiş əhali və sahibkarlıq subyektlərinin dəstəklənməsi üçün bu ilin dövlət büdcəsindən 1.6 milyard ABŞ dolları məbləğində maliyyə yardımı ayrılıb.
Hazırda respublikamızın digər bölgələrində olduğu kimi, Füzuli rayonunda da vaksinasiya prosesi uğurla davam etməkdədir. Bu günə qədər 50 minə yaxın sakinimiz vaksin olunmuşdur.
Əhalinin sağlamlığının qorunması dövlət başçısı cənab İlham Əliyevin daim diqqətdə saxladığı məsələlərdəndir. Ölkə ərazisində xəstəxanaların, modul tipli sağlamlıq obyektlərinin tikilməsi, xəstəxanaların müasir standartlara cavab verən avadanlıqlarla təchizatı, tibb işçilərinin maddi təminatının yaxşılaşdırılması istiqamətində atılan addımlar bu sahədə görülən işlərdəndir. Dövlət başçısının tapşırıqlarına əsasən bizim rayonumuzda da müasir standartlara cavab verən Füzuli Tibb Mərkəzi və Füzuli Rayon Mərkəzi Xəstəxanası tikilib füzulilərin ixtiyarına verilmişdir. Füzuli Tibb Mərkəzində yaradılmış şərait nəticəsində, hətta kənd yerində açıq ürək əməliyyatları keçirilməsi mümkün oldu. Müasir tibbi avadanlıqlarla təchiz edilmiş Füzuli Rayon Mərkəzi Xəstəxanası pandemiya ilə mübarizədə mühüm rol oynadı. Dövlət başçısının tapşırıqlarına əsasən, hər il əhalinin pulsuz tibbi müayinələrinin təşkil olunur. Dünyanı çətin sınaq qarşısında qoyan COVİD-19 pandemiyasına qarşı mübarizədə Azərbaycan nümunəvi ölkə olaraq tanındı. Bütün bunlar Prezident cənab İlham Əliyevin apardığı uğurlu dövlət siyasətinin və həyata keçirdiyi qabaqlayıcı tədbirlərin nəticəsində mümkün oldu. Pandemiyaya qarşı mübarizə tədbirlərinin davamı olaraq əhalinin vaksinasinləşdirilməsi dövlət başçımızın əhalinin sağlamlığına olan diqqətinin növbəti təzahürüdür.
Elçin Qurbanov,
Füzuli Mərkəzi Rayon Xəstəxanası Publik Hüquqi Şəxsin direktoru
