Novruz bayramı Azərbaycan xalqının dəyərlərini özündə birləşdirən milli bayramdır
Novruz bayramı milli ənənəmizin simvolu hesab edilir. Ənənə xalqın dayanıqlı mədəniyyətinin, yaşamının bənzərsiz cəhətlərini təsdiq edir. Novruz əsrlərin dərinliyindən gəlib bizim günlərə çıxmış ən gözəl bayramlardan biridir. Qədim dövrlərdən bəri xalqımız Novruz bayramını yeni ilin başlanğıcı hesab etmiş, onu bolluq, bərəkət və firavanlığın əzəli kimi rəmziləşdirmişdir. Novruz bayramını qeyd etmək təzə ili, baharın ilk gününü qarşılamaq deməkdir.
BMT-nin Baş Məclisinin 64-cü sessiyasında 21 mart bütün dünyada “Beynəlxalq Novruz günü” elan edilmişdir. Dünyanın bir çox ölkələrində üç yüz milyondan çox insanın Novruz bayramını qeyd etməsinə baxmayaraq, qəbul edilmiş qərar məhz Azərbaycan dövlətinin təşəbbüsü ilə baş tutmuşdur. Novruz bayramı həm də YUNESKO- nun qeyri-maddi irsinə daxil edilmişdir.
Novruz bayramında göyərdilən səməni yazın gəlməsinin, təbiətin canlanmasının rəmzidir. Bu bayrama dörd həftə qalmış, insanlar hər çərşənbə axşamı və bayram günü tonqal qalayır, mahnı oxuyur, oda, atəşə, günəşə olan etiqad və inamını ifadə edirlər. Bütün bu mərasimlər də hələ İslamdan daha əvvəl mövcud olmuş qədim Şərq ənənələrinin davamıdır. Novruz bayramını xalqımızın milli bayramı olmaqla yanaşı bu bayram hər il yüksək təntənə ilə keçirilir. Novruz bayramında milli ruhumuzun, qədimliyimizin çalarları yaşayır. Minillər öncə əcdadlarımız inanıblar ki, həyatı var edən od, su, hava və torpaqdır. Novruz – dünyanın və insanın yaradılış bayramıdır. Bu bayram bütün mahiyyəti etibarilə xalqımızın milli varlığı ilə bağlıdır.
Artıq ikinci ildir ki, Azərbaycan xalqı Novruz bayramını xüsusi ruh yüksəkliyi ilə qeyd edir. İki il bundan öncə rəşadətli Azərbaycan Ordusu Müzəffər Ali Baş Komandan cənab İlham Əliyevin rəhbərliyi ilə Vətən müharibəsini tarixi Qələbə ilə başa vuraraq mənfur erməni qəsbkarlarının torpaqlarımızdan qovdu, 30 il işğal altında olan torpaqlarımızı azad etdi. Ali Baş Komandanımızın rəhbərliyi altında Rəşadətli Azərbaycan Ordusu doğma torpaqlarımızı işğaldan azad etdi və xalqımız bundan sonra həmin ərazilərdə Novruz bayramını əbədi qeyd edəcəkdir.
Əli Paşayev,
YAP Tərtər rayon təşkilatının əməkdaşı
