Azərbaycan Belarusdan taxta materiallarının idxalını xeyli artırıb
Azərbaycan 2022-ci ilin ilk üç ayında Belarusdan taxta materiallarının idxalını xeyli artırıb.
ARANTV.AZ “Belta”ya istinadən xəbər verir ki, bu barədə Belarus Universal Əmtəə Birjasından bildirilib.
Birjadan verilən məlumata görə, birinci rübün yekunlarına görə, ümumilikdə taxta materialların ixrac satışının fiziki həcmləri 544 min kubmetrə çatıb ki, bu da ötən ilin müvafiq dövrü ilə müqayisədə 18% çoxdur. Dəyər ifadəsində satışlar 43% artaraq 138 mln. ABŞ dollara çatıb. Yüksək müsbət dinamika yanvar-fevral aylarında alıcıların sayının əhəmiyyətli dərəcədə artması ilə bağlıdır. Bununla belə, mart ayında Belarus taxta məhsullarına qarşı sanksiyaların tətbiqi ilə əlaqədar, əməliyyatların həcmi nəzərəçarpacaq dərəcədə azalıb.
Buna görə də hazırda əsas səylər həm yeni bazarların inkişafına, həm də əvvəllər ağac məmulatlarının idxalında payı əhəmiyyətsiz olan ölkələrə ixracın genişləndirilməsinə yönəldilib.
“Artıq taxta materiallarının tədarükünü 3 dəfədən çox artıra bildiyimiz Çindən əlavə, Qərbi Asiya regionu perspektivli hesab olunur. İlk növbədə bunlar Azərbaycan, Gürcüstan, İsrail, Livan, BƏƏ və Türkiyədir. Bütün bu ölkələr Belarusdan taxta materiallarının idxalını artırmağa hazırdırlar. Məsələn, təkcə Azərbaycana 2022-ci ilin ilk üç ayında ötən ilin həcminin yarıdan çoxu artıq satılıb”, – birjanın mətbuat xidmətindən bildirilib.
Belarus istehsalçılarının daha çevik qiymət siyasəti də ağac emalı məhsullarının birja ixracının diversifikasiyasına kömək edəcəkdir. İxrac kotirovkalarının azalmasının real ifadədə satış həcmlərinin artması ilə kompensasiya edilməsi planlaşdırılır.
