Rayonlarda kirayə evlərin qiyməti bahalaşır
Yay fəsli yaxınlaşdıqca rayonlarda kirayə evlərə tələbat da artır. Bu isə həmin ərazilərdə kirayə evlərin qiymətində artıma səbəb olur.
ARANTV.AZ xəbər verir ki, məsələ ilə bağlı əmlak məsələləri üzrə ekspert Ramil Osmanlı bildirib ki, yaya doğru turizm potensialına malik rayonlarda kirayə mənzillərin bahalaşması qaçılmaz olacaq.
R.Osmanlı qeyd edib ki, yerli və xarici turistlərin ən çox üz tutduğu Qax, Qəbələ, Oğuz, İsmayıllı, Şamaxı, Quba-Xaçmaz və respublikanın cənub rayonlarıdır: “Hazırda həmin rayonların kəndlərində kirayə verilən ikiotaqlı, orta şəraiti olan evin günlük qiyməti 40 manatdan başlayır. Yay aylarında isə bu qiymətlər bahalaşır. 50 manata ev tapmaq belə mümkün olmur. Həmin bölgələrdə elə evlər var ki, onların günlük qiyməti şəraitindən aslı olaraq 300 manatdan başlayır. Qiymətlərə təsir edən əsas amillərdən biri də həmin rayonların paytaxta nə qədər yaxın olmasıdır”, – deyə o əlavə edib.
