Vətənin qəhrəman oğlu
Nurəddin Hasil oğlu Məstəliyevin şəhidliyi də Vətən sevgisindən başlandı. Əslən Yardımlı rayonunun Ökü kəndindən olan, Bakı şəhəri, Qaradağ rayonu, Qızıldaş qəsəbəsində dünyaya göz açmış bu ər igid İkinci Qarabağ müharibəsində misilsiz qəhrəmanlıq örnəyi göstərir. Nurəddin lap cavan yaşında, ömrünün 20-ci baharında bu dünyadan köçsə də, ürəkdən bağlandığı xalqına zəfər sevinci yaşadan qəhrəman oğullardan olur. Adı milyonların dilində dastana dönən bu Vətən sevdalısı həm də dövlət tərəfindən “Vətən uğrunda”, “Füzulinin azad olunmasına görə” “Xocavəndin azad olunmasına görə” medallarına layiq görülür.
Vətənini canından əziz tutmaqla ölməzliyə qovuşan Nurəddin Məstəliyev Azər Namazov adına 180 saylı orta məktəbdə oxuduğu zaman, yəni kisik yaşdan idman həvəs göstərir. Bir çox turnirlərə qatılır, dəfələrlə rəqiblərinə qalib gəlib mükafatlar, sertifikatlar, medallar alır.
İdman məşğuliyyətini peşəkar səviyyəyə çatdıran Nurəddin Karatenin Gōjū-ryū növü üzrə 80 kiloqram çəki dərəcəsində bütün rəqiblərinə qalib gələrək Respublika Birincisi olur. Bundan sonra idman uğurları bir-birini əvəz edir. Bir sıra səviyyəli yarışlara qatılır, yüksək yerləri tutmaqla tanınır, sevilir.
13 Mart 2016-cı ildə Azərbaycan Qocyu-Ryu Okinava Karate-Do və Kobudo Növləri Federasiyasının 20 illiyinə həsr olunmuş XIX Açıq Bakı çempionatınında I yerə layiq görülür. Ümummilli lider Heydər Əliyevin 93-cü ildönümünə həsr olunan XIX Açıq Respublika Kuboku İRİQUMİ-CYUQO döyüş qaydaları üzrə II yeri tutur.17 İyul 2016-cı ildə Azərbaycan Qocyu-Ryu Okinava Karate-Do və Kobudo Növləri Federasiyası yeniyetmələr və Gənclər arasında Bakı Şəhər Açıq Turniri III yeri qazanır. Azərbaycan Qocyu-Ryu Okinava Karate-Do və Kobudo Növləri Federasiyası və Juqo Kobute və Kempo-Ryu Federasiyasının böyüklər, gənclər və yeniyetmələr arasında XIX Açıq Respublika Çempionatda İRİQUMİ-CYUQO döyüş qaydaları üzrə dərəcəsində bacarıq göstərərək yarışda III olur.
İdman uğurları ilə respublikada ad qazanan Nurəddin 2016-cı ildə orta məktəbi bitirdikdən sonra 8 saylı texniki peşə liseyində qaynaqçı peşəsi üzrə ixtisaslaşır. Buranı başa vurub doğma Azərbaycanın müdafiəsinə yola düşür. 2020-ci ilin sentyabr ayına qədər Dövlət Sərhəd Xidmətində Vətənə göstərdiyi sədaqət onu əsgərlərin, zabitlərin gözündə ucaldır. Peşəkar idmançı olduğu üçün kəşfiyyat bölüyünə qoşulur.
Sentyabrın 27-də Vətən müharibəsi başlanan andan yağı düşmənlə ağır döyüşə girir. Cəbrayıl və Xocavənd uğrunda gedən döyüşlərdə qəhrəmancasına iştirak edir. Yüngül yaralansa da, şücaətindən qalmır. Şuşada düşmən snayperinin gülləsinə tuş gəlir, Aldığı xəsarətdən yerindəcə şəhidlik zirvəsinə ucalır. Şəhid 13 noyabr 2020-ci ildə valideynləri ilə yaşadığı Qızıldaş qəsəbəsinə gətirilir, burada torpağa tapşırılır.
Beləcə, öz qanı ilə Azərbaycanın yeni şanlı tarixini yazan oğlanlardan biri də Nurəddin Məstəliyev olur.
Zəfər Orucoğlu,
Azərbaycan Jurnalistlər Birliyinin üzvü
