İftixarla xatırlanan Vətən oğlu

İkinci Qarabağ müharibəsində şirin canını doğma Vətən torpağı uğrunda qurban verib ömrünün qönçə cağında-18 yaşında  şəhidlik zirvəsinə ucalan bir igidimiz  Araz Namiq oğlu Mirzəyevdir. Lənkəran rayonunun Cil kəndində boya-başa çatan, nəsibi  şəhidlik  səadəti olan bu Vətən sevdalısı  göstərdiyi qəhrəmanlıqla  Azərbaycanımıza  şərəf olur.

Uşaq yaşlarından Vətənin müqəddəsliyini başa düşən, yaxşı insanlardan görüb-götürən Araz orta məktəbi bitirəndə el-obada nəcib, bacarıqlı bir gənc kimi hamı tərəfindən hörmətlə qarşılanır. O, 2020-ci ildə Vətən qarşısında borcunu ödəmək üçün hərbi xidmətə yola  düşəndə deyir:” Artıq erməni dığalarına layiqli dərs verməyin məqamı gəlib. Yağıdan qisasımı almamış geri  dönmərəm.”

O, cəbhə bölgəsinə düşür. Doğma Azərbaycana ürəkdən bağlanan, düşmənə nifrət bəsləyən Araz buna görə qürur keçirir. Mərdliyi, cəsurluğu onu  çox sınaqlarda üzüağ çıxardır.  Atıcılıq peşəsinə dərindən yiyələnir. Hərbi hissədə keçirilən müxtəlif təlimlərdə fərqlənir, komandirlərin əmr və tapşırıqlarını can-başla yerinə yetirir.  Odur ki, əsgərlər ona hörmət bəsləyir, özlərinə  doğma qardaş  bilirlər. Səbirsizliklə gözlədiyi gün-27 sentyabrda başlanan Vətən müharibəsində ölüm-dirim savaşa birinci girir və 30 il əsir düşən  hər qarış torpağın azad olunacağı anadək yağı düşmənlə döyüşəcəyinə  and içir.

İgid  əsgər  Araz  qatıldığı döyüşlərdə hər gün yeni-yeni  qəhrəmanlıqlar göstərir. Düşmənə sarsıdıcı zərbələr vurur,  ona böyük itkilər verir. Vətən torpaqları erməni fasızım əsarətindən xilas olunca qorxu bilmədən, başına yağan  güllərdən ehtiyat etmədən  inamla qələbəyə  doğru irəliləyir. Nəyin bahasına olursa-olsun, müqəddəs  Qarabağı torpaqlarını  tezliklə  yağı tapdağından azad   görmək  istəyir.

14 oktyabrda  Tərtər rayonunu  Suqovuşan  qəsəbəsində şiddətli döyüşlər başlanır. Müharibə meydanında yenə də düşmənin anasını ən çox ağladan  Araz olur. Onun zərbələri qarşısında  ölən dığaların sayı bilinmir. Özü isə qəhrəmanlıqla  şəhid olub  ölməzliyə  qovuşur.

Vətəninə, xalqına başucalığı gətirən Araz  Namiq oğlu ölümündən  sonra  “Vətən uğrunda”,  Suqovuşanın, Laçının azadlığına görə medallarına layiq olur.

Zəfər Orucoğlu,
Azərbaycan Jurnalistlər Birliyinin üzvü