Böhtan dağarcıqları
Qərbin «beşinci kolon» ssenarisinin əsas oyunçularından olan və getdikcə radikallaşan AXCP sədri Əli Kərimlinin partiyasında yaranan qaşıdurmalar «islahatçı sədr»in qürub günlərinin yaxınlaşdığından xəbər verir. Əli Kərimlinin və yaxın ətrafının radikal dini qurumlarla, ermənilərlə yaxınlığından narazılıqlarını istefa verməklə bildirən partiyanın təkəm-seyrək üzvləri Əli Kərimlinin avtoritarizmindən, partiyalararası münaqişələr yaratmaq əməllərindən də bezib, cana doyular. Əli Kərimlinin başçılıq etdiyi «beşinci kolon» un sosial bazadan məhrum olması, «Milli Şura»da çəkişmələrin davam etməsi ilə yaranan hərc-mərclik artıq aqressivliklə nəticələnir.
Azərbaycana qarşı təxribatlarını əməkdaşı olduğu « Azadlıq” radiosu» vasitəsilə aparan Xədicə İsmayılı da əvəz edən Əli Kərimli indi «Osmanqızı TV»də «məskunlaşaraq» cəfəng bəyanatlarla çıxış edir. İctimaiyyət arasında tanınmış insanlara açıq-aşkar düşmən münasibət nümayiş etdirir, təhqiramiz yalanlar yayır. Azərbaycanı istəməyən kənar qüvvələrin, xarici dairələrin oyuncağına çevrilən Əli Kərimlinin və dövlətçilik barədə elementar anlayışı olmayan satqın trollar dəstəsinin yalan və böhtanlarına inanan, siyasi savadı olmayanları mitinqlərə çağırmaqda belə çətinlik çəkən «islahatçı sədr» zorla ələ keçirdikləri AXC-Müsavat dövründəki iqtidarlıq dövrünün xiffətini çəkir. O dövrdə iqtidarda layiq olmadığı dövlət katibi kimi məsul vəzifəyə yiyələnən, Azərbaycanı parçalanmaq həddinə gətirən Əli Kərimlinin və komandasının yalanlarına inanmayanları sosial şəbəkələrdə təhqir edən trollar da sədrləri kimi xəyanətkardırlar. Çünki «dövlət katibi» kimi « respublikada mafioz qüvvələr güclənir, onlar demək olar ki, ölkəni idarə edirlər» söyləyən Əli Kərimlinin hazırkı iqtidar barədə böhtan yağdırması gülüncdür. O dövrdəki baş prokurorun «iflic vəziyyətində olan dövlət aparatının özü rüşvətxorluqla məşğuldur», Ali Məhkəmə sədrinin « Nazirlər Kabineti bu gün milyarderlərdən ibarətdir» sözləri bilavasitə dövlət katibinin yarıtmaz xidmətinin ifşasıdır. O günləri yaddan çıxaran Əli Kərimlinin bu gün obyektivlikdən, demokratiyadan danışmağa haqqı yoxdur. Bu gün kənardan aldığı qrantlar hesabına milli mənsubiyyətini hərraca çıxaran Əli Kərimli hakimiyyət ambisiyalarını təmin etmək üçün anti-Azərbaycan dairələrə ölkəmizlə bağlı yalan informasiyalar göndərməsi də köhnə vərdişin davamıdır. Radikalların xəyanətkarlıqlarının, aqressivliklərinin artmasının səbəbi acizliklərini etiraf etmək cəsarətlərinin olmamasıdır. Siyasi naşılıq və vətənpərvərliyin, konstruktivizm qabiliyyətinin olmaması, hakimiyyət hərisliyi, hadisələrə dövlətçilik təfəkkürü mövqeyindən qiymət verməyi bacarmamaq və xaricdəki antiazərbaycan qüvvələrindən asılılıq nəticəsində radikal müxalifət hökumətə qarşı mübarizəni dövlətin maraqlarına qarşı çevirmək Əli Kərimlinin, «Milli Şura»nın şüursuz sədri Cəmil Həsənlinin gündəlik iş prinsipidir. Ölkəmizdə baş verən yenilikləri, inkişafı inkar etməklə illərdən bəri «nə qədər pis olsa, bir o qədər yaxşıdır”» prinsipinə uyğun qarayaxma əməllərini davam etdirən bu səbatsızlar üçün Vətən, torpaq, yurd məfhumu xəyanətdən qaralmış şüurlarında pas atmışdır.
Siyasi uğursuzluqlarının və ambisiyalarının perspektivsizliyini başa düşən AXCP üzvlərinin sədrlərinə etirazlarının bir səbəbi də Əli Kərimlinin erməni dayılarına sonsuz məhəbbətinin artmasıdır. Dünya siyasətinin gündəmində olan, Xankəndi separatçılarının uydurma ssenarisi əsasında təşkil edilən «humanitar böhran»ın xiffətindən əriyən AXCP sədri Əli Kərimlinin yurdu viran qalıb. Əli Kərimli kimilər xalqımızın mənafeyini müdafiə etmək əvəzinə Laçın sərhəd-buraxılış məntəqəsində düzəldilən şouda Azərbaycanı təqsirləndirir, məsələ ilə bağlı havadarlarına yalan informasiyalar ötürürlər. Təki qrant payları artıq olsun. Ermənilərdən daha artıq canfəşanlıqla Xankəndinin Ermənistana məxsus olduğunu bildirən Tofiq Yaqublu kimi «Milli Şura»nın sədri Cəmil Həsənli də «Soros Fondu»ndan aldığı 200 dollar müqabilində milli heysiyyətini hərraca çıxarıb. Səsi hərdən bir ölkədən gələn, millilikdən kənar quruma sözdə rəhbərlik edən, əslində isə Əli Kərimlinin «cibi» adlandırılan Cəmil Həsənli kimi şuranın erməni xislətli üzvləri hayların arzularının gerçəkləşməsinə can-başla xidmət edirlər.
Müxtəlif ölkələrdə törədilən rəngli inqilabların müəllifi kimi tanınan Sorosun məvacibinə göz dikənlər istər-istəməz aldıqları qrant müqabilində anti-Azərbaycan təxribatlarını davam etdirməlidirlər. Vicdanlarını belə ağalarına icarəyə verən bu antimillilər ölkəmizdə sabitliyin pozulması üçün aldıqları külli miqdarda qrantı aksiya və mitinqlərin keçirilməsinə sərf etməyə çalşsalar da, niyyətləri baş tutmadı, bütün cəhdləri boşa çıxdı. Xalqın nifrətini qazanan əlikərimlilər, cəmilhəsənlilər bir dəfə də olsun Ermənistanın işğalından azad edilmiş ərazilərimizdə aparılan bərpa-quruculuq işlərindən bəhs etməmişlər. Bütün dünyanın heyrətlə izlədiyi inkişafın Azərbaycan modelinin sürətindən gözləri qapanan, Sorosla əməkdaşlıq edən bu xəyanətkarlar Azərbaycanın milli maraqlarına , dövlətçiliyimizin, müstəqilliyimizin qorunmasına qarşı çıxaraq xalqımızın istəklərinin üzərindən belə xətt çəkirlər.
Daşnak düşüncəli , «Qarabağ ermənilərinə status verilməsini» separatçılardan artıq tələb edən Tofiq Yaqublu «Zəngəzur dəhlizinin açılmasını siyasi avantüra» adlandırır. Meşəlidə kənd sakinlərinə qarşı qətliam törədən cəllad Vaqif Xaçaturyanın Laçın sərhəd-keçid məntəqəsində həbsini «Azərbaycan məhkəməsinin siyasiləşdirilməsi» kimi qələmə verən əlikərimlilər üçün Naxçıvan Muxtar Respublikasında yerləşən hərbi hissədə qulluq edən, yararsız hava şəraitində yolu itirərək Ermənistan tərəfə keçən iki əsgərimizin taleyi maraqlandırmır. Laçın sərhəd –keçid məntəqəsində xarici təşkilatların nümayəndələrinin ermənilərə dəstək fonunda yaranan gərginlikdən belə narahat olmayan bu antimillilər Azərbaycanın qətiyyətli mövqeyini erməni təəssübünə dəyişirlər. Amma unudurlar ki, 30 ilə yaxın Ermənistanın işğalı altında qalan torpaqlarımızı 44 gündə azad edən Azərbaycan separatçılara da lazımi cavablarını verəcək, yerlərini göstərəcək.
Hazırda Əli Kərimlini, Cəmil Həsənlini, Tofiq Yaqublunu düşündürən əsas məsələ nə yolla olursa –olsun daha çox qrant qazanmaqdır. Xəyanət bazarında satışa çıxarılan məhsullar isə milli xəyanətkarların pas bağlamış vicdanlarıdır. Ermənipərəstlərin pulu ilə Azərbaycana qarşı hansı məkrli niyyət düşünülür, qərəzli plan cızılırsa, Əli Kərimli o planın sapı, icraçısıdır. Vaxtilə dünya bazarında neftin qiymətinin 14 dollara düşməsini toy-bayram kimi qeyd edən satqın «şura”çıların» xəyanətlərini saymaqla bitməz. Hələ də təxribat maşınlarını anti-Azərbaycan ruhu ilə idarə edənlərin əbədi qazancı isə Azərbaycan xalqının nifrətidir.
