Xocavənddə mina terrorunda şəhid olan polis Sumqayıtda dəfn olunub – YENİLƏNİB
Ermənilərin Xocavənddə törətdiyi mina terroru nəticəsində şəhid olmuş Ramil Şirinov Sumqayıtda dəfn olunub.
ARANTV.AZ xəbər verir ki, şəhid polis Sumqayıt Şəhidlər xiyabanında torpağa tapşırılıb.
***
Ermənilərin Xocavənddə törətdiyi mina terroru nəticəsində şəhid olmuş Ramil Şirinovun nəşi Sumqayıta gətirilib.
ARANTV.AZ xəbər verir ki, şəhidlə yaşadığı ünvanda vida mərasimi keçirilir.
Qeyd edək ki, 19 sentyabr 2023-cü il tarixdə Azərbaycan Respublikası Daxili İşlər Nazirliyinin (DİN) əməkdaşlarının olduğu “Kamaz” markalı nəqliyyat vasitəsi həmin gün Əhmədbəyli-Füzuli-Şuşa yolunun Xocavənd rayonundan keçən 58-ci kilometrliyində Azərbaycan Avtomobil Yolları Dövlət Agentliyi əməkdaşlarının öldürülməsi ilə nəticələnmiş terror hadisəsinin baş verdiyi yer istiqamətində hərəkət edərkən saat 04:30 radələrində Xocavənd rayonunun Tağaverd kəndi ərazisində yeni inşa olunan tunel yolunda sülhməramlıların müvəqqəti yerləşdiyi ərazidə fəaliyyət göstərən qanunsuz erməni silahlı birləşmələrinin təxribat-diversiya qrupu tərəfindən yerləşdirilmiş minaya düşərək partlayıb, törədilmiş terror aktı nəticəsində DİN-in əməkdaşları olan 05.02.1994-cü il təvəllüdlü Camalzadə Asim Knyaz oğlu, 08.07.1987-ci təvəllüdlü Şirinov Ramil Arif oğlu, 12.07.1991-ci il təvəllüdlü Mahmudov Seymur Elsevər oğlu və 21.07.1998-ci il təvəllüdlü Zamanov Xəzər Azər oğlu hadisə yerində həlak olublar.
