Mədəniyyətlərin Birləşdiyi Ölkə konfransı keçirilib – FOTO
ADA Universitetində Birləşmiş Millətlər Təşkilatının Təhsil, Elm və Mədəniyyət Təşkilatının dəstəyi, Azərbaycan Respublikasının Gənclər Fondunun tərəfdaşlığı və NAYORA-nın təşkilatçılığı ilə “Mədəniyyətlərin Birləşdiyi Ölkə” konfransı keçirilib.
Layihənin həyata keçirilməsində əsas məqsəd gənclərin mədəniyyətlərarası dialoqda aktiv iştirakını stimullaşdırmaq və ölkəmizdəki multikulturalizm, həmçinin tolerantlıq dəyərlərini təbliğ etməkdən ibarət olub.
Layihə çərçivəsində azsaylı xalqların və etnik azlıqların mədəniyyəti, tarixi yaşayışları, adət-ənənələri və onlara göstərilən dövlət qayğısını özündə əks etdirən sənədli film və jurnal hazırlanıb. Jurnal Azərbaycan dilindən əlavə olaraq, 6 dilə tərcümə olunacaq.
Proqrama uyğun olaraq konfrans zamanı ilk olaraq ümummilli lider Heydər Əliyevin və ölkəmizin ərazi bütövlüyü uğrunda həlak olan Şəhidlərimizin əziz xatirələri bir dəqiqəlik sükutla yad edilib, daha sonra Azərbaycan Respublikasının Dövlət Himni səsləndirilib.
NAYORA-nın sədri Azər Əliyev açılış nitqi ilə çıxış edərək Azərbaycanda yaşayan azsaylı xalqlarla bağlı dövlət tərəfindən atılan məqsədyönlü addımlardan, müharibə dövründə canını torpaqlarımız uğrunda qurban verən azsaylı xalqların nümayəndəsi olan gənclərin qəhrəmanlıqlarından danışmış, həmçinin dövlətin dəstəyi ilə gənclər arasında bu cür təbliğat layihələrinin tez-tez həyata keçirildiyini xüsusilə vurğulamışdır.
Ulu öndərin “Azərbaycanın varı, dövləti təkcə onun pambığı, yeraltı, yerüstü sərvətləri deyil, onun ərazisində yaşayan xalqlardır” sitatını nümunə gətirərək və ölkəmizin multikulturalizm tarixindən söz açaraq, günümüzdə bu ənənələrin Prezident İlham Əliyev tərəfindən uğurla davam etdirildiyini qeyd etmişdir.
Tədbirin rəsmi açılış hissəsində Azərbaycan Respublikasının Gənclər və İdman nazirinin müavini İndira Hacıyeva, Azərbaycan Respublikasının Gənclər Fondunun İcraçı direktoru vəzifəsini icra edən Qədir Xəlilov, Bakı Slavyan Universitetinin rektoru Anar Nağıyev və Bakı Beynəlxalq Multikulturalizm Mərkəzinin İcraçı direktoru Rəvan Həsənov çıxış edərək öz fikirlərini iştirakçılarla bölüşüblər.
Qeyd edək ki, hazırlanan sənədli film təqdim edildikdən və sərgiyə baxış keçirildikdən sonra panel müzakirəsi öz işinə başlayıb.
NAYORA-nın Baş katibi Ramin Həbibzadənin moderatorluğunu etdiyi panelin spikerləri qismində İslam Əməkdaşlıq Gənclər Forumu Avrasiya Regional Ofisinin Baş direktoru vəzifəsini icra edən Vüsal Qurbanov, Dini Qurumlarla iş üzrə Dövlət Komitəsinin şöbə müdiri Əli Həzi, Mənəvi Dəyərlərin Təbliği Fondunun İcraçı direktorunun müavini Hatəm Gülməmmədov, Avropa Gənclər Parlamenti Azərbaycan İctimai Birliyinin prezidenti Güldanə Dadaşova çıxış edib.
Panel müzakirəsi zamanı Azərbaycanın Multikulturalizm Siyasətinin beynəlxalq arenada gənclərimiz vasitəsilə həyata keçirilməsi, müasir mədəniyyətdə ənənəvi dəyərlərin yaşadılması, Azərbaycanda dinlərarası yanaşmalarda tolerantlıq dəyərləri, İslam ölkələri arasında mədəniyyətlərarası dialoqda gənclərin rolu kimi mövzular ətraflı müzakirə olunub, həmçinin iştirakçıların ünvanladığı suallar cavablandırılıb.
