Çalışın, çox yeməyin – HƏKİM MƏSLƏHƏTİ
Yeni ildə hər kəs bayramı qeyd etmək üçün müxtəlif növ təamlar hazırlayır. Bu təamlar arasında xüsusilə bol yağ və mayonez tərkibli olanlar daha çox üstünlük təşkil edir. Belə ərzaqların istifadə olunduğu yeməklərin birdən-birə çox yeyilməsi isə insanlarda müəyyən problemlər yarada bilər.
Ümumiyyətlə, insanların bayram günü necə qidalanmalıdır? Süfrədə yüksək kalorili yeməklərdən, necə istifadə edilməlidir? Hansı məhsullardan tamamilə uzaq durmaq məsləhətlidir?
Səhər yeməyini gec yeyin
Məsələ ilə bağlı “İki sahil”ə danışan həkim-dietoloq Tutu Zeynalova deyib ki, bayram günlərində yediklərimizin bizə sağlamlıq problemi olaraq geri gəlməməsi üçün öyünlərimizin sayını azalmalıyıq:
“Təbii ki, hər birimiz öz ailəmiz və yaxınlarımızla bayram günlərini gözəl və bərəkətli keçirtmək istəyirik. Ona görə də, çalışırıq ki, süfrəmizdə bütün təamlar və nemətlər olsun və onlardan bol-bol istifadə edək. Lakin qidalanarkən bəzi məqamlara diqqət yetirməliyik. Belə ki, normalda gün ərzində 3-4 dəfə qidalanırıqsa, bayram günlərində gün ərzində cəmi 2 dəfə qidalansaq yaxşı olar. Məsələn, səhər yeməyini gec yeyib, arada bir meyvədən istifadə edə bilərik. Bununla da, axşam rahatlıqla yeməklərimizi yeyə bilərik”.
Toyuq, balıq, hinduşka…
Dietoloqun sözlərinə görə, axşam yeməyində də bəzi məqamlara diqqət etməliyik: “Belə ki, yeməyə ilk növbədə salatla başlamaq məsləhətlidir. Bayrama hazırladığımız salatlarda da az mayonez və xamadan istifadə etməyə çalışaq. Həmçinin, süfrəmizdəki yeməklərdə bəyaz ətdən, məsələn, toyuq, balıq, hinduşqadan istifadə etsək daha yaxşı olar. Qırmızı ətdən istifadə isə axşam saatlarında yaxşı həzm olunmadığı və həzmsizlik problemi yaratdığı üçün tövsiyə olunmur. Beləliklə, yeməyə salatla başlayıb, ətlə davam edib, çörəyi, karbohidratı, yəni qarniri sona saxlasaq, daha yaxşı olar. Onda, qan şəkərimiz də sürətlə yüksəlməz və yeməkdən sonra bizi “yuxu basmaz”.
Bayram gecəsi mütləq şirniyyat yeyəcəm deyirsinizsə…
Bundan əlavə, yeməkdən öncə yaxşı olar ki, bir stəkan suya bir xörək qaşığı ev üsulu hazırlanmış alma sirkəsini qatıb yeməklə bərabər və yeməkdən öncə içək. Bu, yeməkdən sonra yarana biləcək həzmsizlik və köp kimi şikayətləri aradan qaldıracaq. Həmçinin, yeməyi tələsməyək, yaxşı-yaxşı çeynəyək. Bununla da daha az yeyəcək və yediklərimizin daha rahat həzm olunmasına kömək edəcəyik. Yeməkdən sonra əgər desert varsa, onu növbəti günə saxlamaq daha əlverişli olar. Amma məhz bayram gecəsi şirniyyat yeyəcəm deyirsinizsə, onda meyvə yeməyin. Ümumiyyətlə, karbohidratlardan az istifadə edin. Məsələn, yeməyi çörəksiz, düyüsüz yeyin. O zaman kiçik bir dilim şirniyyatdan istifadə edə bilərsiniz. Şirniyyat alarkən südlü olmasına diqqət edin. Bol kremli və biskvitli olmaması arzuolunandır.
Qazlı su yox, kompot
Yemək süfrələrində olacaq içkilər siyahısında isə adi limonlu və ya adi su, çox şəkər qatılmamış kompotlar ola bilər. Həmçinin, mümkün olarsa, yeməkdən sonra 15 dəqiqə piyada gəzmək də faydalıdır. Bu, qan şəkərimizin dalğalanmasının qarşısını alacaq və bayram səhəri baş ağrısı ilə oyanmamağımıza kömək edəcək”.
Sayalı Abasova
