Bu gün üzərində qürurla gəzdiyimiz bu torpağı özünə tarixi Vətən bilən Azərbaycan insanı, Bayramın mübarək!

30.12.2023 Vüsal Rafiqoğlu

Qalib xalqımız Dünya Azərbaycanlılarının Həmrəyliyi Gününü böyük təntənə ilə qeyd edir

Azərbaycan xalqı, eləcə də dünyanın müxtəlif ölkələrində məskunlaşmış soydaşlarımız, hər il dekabrın 31-ni- Dünya Azərbaycanlılarının Həmrəylik Gününü böyük təntənə ilə qeyd edirlər. İldən-ilə bu bayram daha da kütləvi və coşqu hissi ilə keçirilir. Bu gün üzərində qürurla gəzdiyimiz bu torpağı özünə tarixi Vətən bilən hər bir insanın belə bir həmrəylik nümayiş etdirməsi qürurvericidir.Dünya azərbaycanlılarının həmrəyliyini, onların təşkilatlanmasını daim diqqət mərkəzində saxlayan Ümummilli Liderimiz, dahi şəxsiyyət Heydər Əliyev uzaqgörən siyasəti ilə, xalqı öz ətrafında birləşdirməyə müvəffəq oldu .
Ümummilli Liderimiz 31 Dekabr Dünya Azərbaycanlılarının Həmrəylik Günü münasibətilə xarici ölkələrdə yaşayan soydaşlarımıza müraciətlərindən birində deyirdi: «Dünya Azərbaycanlılarının Həmrəylik Gününün dövlət bayramı kimi qeyd edilməsi xalqımızın milli azadlıq mübarizəsinin məntiqi nəticəsi olaraq artıq xoş ənənəyə çevrilmişdir. Qədim və zəngin tarixə malik olan Azərbaycan xalqının dirçəlişini, tərəqqisini və milli birliyini əks etdirən, onu müstəqil dövlətçilik uğrunda müqəddəs və məsuliyyətli mübarizəyə səfərbər edən həmrəylik günü hər bir azərbaycanlı üçün inam və ümid anıdır. Hal-hazırdadünyanın müxtəlif ölkələrində milyonlarla soydaşımız yaşayır, işləyir, fəaliyyət göstərir. Buna baxmayaraq, onların milli-mənəvi varlığını yaşadan yeganə bir dövlət var. Bu, müstəqil, suveren Azərbaycan Respublikasıdır. Dünya azərbaycanlılarının birliyi və həmrəyliyi ideyasının əsasını da məhz Azərbaycan dövlətçiliyinə, xalqımızın dilinə, dininə, milli-mənəvi varlığına və ümumbəşəri dəyərlərə hörmət, onların daim qorunmasına, yaşamasına qayğı təşkil edir».
31 dekabr tarixinin bütün dünya azərbaycanlılarının birlik, həmrəylik günü kimi hər il böyük təntənə və qürur hissi ilə qeyd olunduğunu bildirən Ulu Öndərin siyasi kursunun layiqli davamçısı, Azərbaycan Respublikasının Prezidenti İlham Əliyev də öz növbəsində dünya azərbaycanlılarının bir amal uğrunda birləşməsi istiqamətində ardıcıl və konseptual siyasət yürütməyə müvəffəq oldu. Dövlət başçısının imzaladığı sərəncamlarla Bakı şəhərində 2006-cı il martın 16-da Dünya Azərbaycanlılarının II, 2011-ci il iyulun 5-6-da III, 2016-cı il iyunun 3-4-də isə IV qurultayının keçirilməsi diaspor quruculuğu işinə əsaslı töhfə vermişdir. Bu qurultaylar dünya azərbaycanlılarının birlik və həmrəyliyinin təntənəsi baxımından mühüm tarixi əhəmiyyət kəsb edir. Həmrəylik günü milli birlik, Azərbaycana məhəbbət, milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirir. Bu birliyin bariz nümunəsi Vətən müharibəsində bir daha öz təsdiqini tapmış oldu.

2020-ci ilin 27 sentyabr tarixində Ermənistan silahlı qüvvələrinin Azərbaycan ərazilərinə müdaxiləsi 44 günlük İkinci Qarabağ müharibəsinin başlamasına səbəb oldu. Xalqımız müharibənin ilk günündən dövlət başçısı, Silahlı Qüvvələrin Ali Baş Komandanı İlham Əliyevin rəhbərliyi altında bütün torpaqlarımızın işğaldan azad ediləcəyinə tam əmin idi. Bu məntiqin təsdiqi olaraq düşmən bu gücün qarşısında cəmi 44 gün tab gətirə bildi. 30 il işğal altında inləyən Azərbaycan torpaqları düşmən tapdağından azad edildi. Sıldırım qayalarla əhatələnən qədim Türk torpağı– Şuşanın noyabrın 8-də azad olunması bu qəhrəmanlığın zirvəsi idi. Azərbaycan əsgərinin şücaətinə, bacarığına dünyanın hərbi mütəxəssisləri də heyran qaldı.

2022-ci ildə Dünya Azərbaycanlılarının V Qurultayı – Zəfər qurultayı Şuşada keçirildi. Azərbaycan prezidenti, Müzəffər Ali Baş Komandan İlham Əliyev 65 ölkədən 400-dən çox diaspor nümayəndəsi və qonağın qatıldığı qurultaydakı nitqində xüsusi vurğulamışdır: «Buraya gələrkən 2001-ci ildə keçirilmiş ilk qurultayı xatırlayırdım. Bildiyiniz kimi, ulu öndər Heydər Əliyevin təşəbbüsü ilə ilk qurultay 2001-ci ildə keçirilib. O, dərin məzmunlu çıxışında, eyni zamanda, təbii ki, Qarabağ problemi ilə bağlı öz fikirlərini bildirmişdi və demişdi ki, Azərbaycan öz ərazi bütövlüyünü bərpa edəcək, işğal altında olan torpaqlar işğaldan azad ediləcək və Azərbaycan xalqı öz dədə-baba torpaqlarına qayıdacaqdır. Biz – ulu öndərin davamçıları bu sözləri gerçəyə çevirdik və V qurultaya hazırlıq işləri başlayarkən mənə məruzə edildi və mən dedim ki, bu qurultay mütləq Şuşada keçirilməlidir. Əminəm ki, qurultay iştirakçıları da buna çox müsbət yanaşıblar və böyük həvəslə Şuşaya, qədim Şuşaya, bizim mədəniyyətimizin paytaxtı olan Şuşaya gəlmişlər. Şuşa da öz doğmalarını bax, belə günəşli hava ilə qarşılayır və bu, bir daha onu göstərir ki, bura bizim tarixi torpağımızdır. Hətta təbiət, günəş də bizimlə həmrəydir».

Dövlətimizin diaspor siyasəti, həmvətənlərimiz arasında birlik və həmrəyliyinmöhkəmləndirilməsi, onların daha mütəşəkkil formada təşkilatlanması prosesi özünün yeni mərhələsinə qədəm qoyub. Belə ki, dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynayır, respublikamızla qarşılıqlı əlaqələrin genişlənməsinə böyük töhfə verir, Azərbaycan həqiqətlərinin dünya ictimaiyyətinə çatdırılmasında, zəngin mədəni irsimizin təbliğində, təcavüzkar erməni dairələrinin ideoloji təxribatlarının qarşısının alınmasında qətiyyət nümayiş etdirirlər.

Şübhəsiz ki, bütün bu nailiyyətlər Ümummilli Lider Heydər Əliyev və onun layiqli davamçısı Müzəffər Ali Baş Komandan İlham Əliyevin apardığı düzgün və böyük gələcəyə hesablanmış praqmatik siyasətin məntiqi nəticəsidir.

Biz də«AranMedia»GROUP olaraq bütün xalqlımızı 31dekabrDünya Azərbaycanlılarının Həmrəyliyi Günü və qarşıdan gələn Yeni İl münasibətilə təbrik edir, xalqımıza işğaldan azad edilmiş ərazilərimizdə aparılan quruculuq işlərində əzm, daha böyük uğurlar arzulayırıq.

Bu həmrəyliyin bizi yeni-yeni qələbələrə aparacağı ümidi ilə, bayramların mübarək,Müzəffər Azərbaycan!