Kənan Rövşənoğlu: “Din sahəsində ciddi problemlər zamanla üzə çıxacaq”
Prezident İlham Əliyevin fevralın 16-da imzaladığı sərəncamla Nazirlər Kabinetinin yeni tərkibi formalaşmış oldu. Bir-iki istisna ilə. O sırada Dini Qurumlarla İş üzrə Dövlət Komitənin (DQİDK) sədri – 70 yaşlı Mübariz Qurbanlıya etimad göstərilmədi. Ümumiyyətlə, son dövrlər komitə ilə bağlı narazılıqlar səngimək bilmirdi. Dini sahədə yaranan boşluqların olmasını məhz DQİDK-nın fəaliyyətsizliyi ilə əlaqələndirənlər çox idi.
Milli Məclisin İctimai birliklər və dini qurumlar komitəsinin üzvü, ilahiyyat üzrə fəlsəfə doktoru Ceyhun Məmmədov da məsələ ilə bağlı mediaya açıqlamasında deyib ki, dini sahədə ciddi islahatlara ehtiyac var: “Bütövlükdə din siyasəti, din sahəsi komitəyə həvalə olunub. Ona görə də bu vəzifəyə təyin olunan şəxsin dini dərindən bilməsi çox önəmlidir. Digər tərəfdən, düşünürəm ki, sürətli formada lazımi islahatları həyata keçirəcək bir şəxs olmalıdır ki, qarşımıza qoyduğumuz məqsədlərə nail ola bilək. Mən əvvəlki müsahibələrimdə bu məsələyə geniş toxunmuşam. Dini Komitənin fəaliyyətindən narazılığımı dəfələrlə bildirmişəm. Hesab edirəm ki, komitə fəaliyyətini cənab Prezidentin apardığı siyasətə uyğun qurmayıb. Bu gün komitənin fəaliyyətində çox ciddi problemlər var və bu problemlər aradan qaldırılmalıdır. Həm islahatlar, həm də dövlət-din münasibətləri ilə bağlı xeyli məsələlər var ki, öz həllini tapmalıdır. Komitə ümumiyyətlə fəaliyyətini yenidən qurmalı və daxildə çox ciddi kadr islahatları aparılmalıdır. Təsadüfi adamlar bu qurumdan tamamilə kənarlaşdırılmalıdır”.
Kənan Rövşənoğlu
Məlumdur ki, hazırda Səyyad Aran (sədrin keçmiş 1-ci müavini) komitə sədri səlahiyyətlərini icra edir. Bundan sonra komitədə nə kimi dəyişikliklər aparılmalıdır? İş necə qurulmalıdır? Boşluqlar əsasən harada idi? Səyyad Arandan gözləntilər nədir?
Onu da qeyd etməliyik ki, Azərbaycanda illərdir dini sahədə tolerantlıq, dözümlülük bütün dünyaya nümayiş etdirilib. Bunu ölkəmizdə müxtəlif dindən, millətlərdən olan insanların hər hansı problem olmadan birgə yaşamasından açıq şəkildə görmək olur. Bu baxımdan dini sahə, din siyasətinin düzgün təşkil edilməsi ölkəmiz üçün olduqca əhəmiyyətlidir. Nəzərə alsaq ki, zaman-zaman Qərb və ya ona yaxın ölkələr dini alət edərək Azərbaycan əleyhinə hesabatlar hazırlayır, qərəzli çağırışlar edirlər. O baxımdan dini qurumlara rəhbərlik edən şəxslər və onların bu istiqamətdə fəaliyyəti də olduqca mühümdür.
Dini mövzular üzrə ekspert Kənan Rövşənoğlu mövzu ilə bağlı “Yeni Müsavat”a fikirlərini açıqladı. O dedi ki, dini sahədə görülməli olan çoxlu işlər var: “Təbii ki, ciddi əskikliklər də var, hansılar ki, zaman-zaman bunlar mediada ifadə olunub. Dini Qurumlarla İş üzrə Dövlət Komitəsinin səlahiyyətləri son illərdə xeyli genişləndirilib və demək olar ki, ölkədə dini fəaliyyətlərə əsas cavabdeh quruma çevrilib. Lakin qurum hələ də sovet metodlu nəzarət qurumu kimi fəaliyyət göstərir, halbuki hazırkı səlahiyyətləri komitənin nəzarət orqanı deyil, dini fəaliyyətləri həyata keçirən və onların təşkilində bilavasitə iştirak edən, başqa sözlə, dini vəziyyətə cavabdeh qurumdur. Bu mənada komitənin işində ciddi dəyişiklik edilməli, iş metodlarında ciddi islahatlara gedilməlidir. Doğrudur, bu, dini qurumlara nəzarət orqanıdır. Amma hazırkı səlahiyyətləri nəzarətdən daha çox işləri komitənin üzərinə qoyur, bu mənada komitə artıq yarandığı illərdəki funksiyalarının sərhədlərindən çox kənara çıxıb, böyüyüb. Odur ki, yeni iş prinsipləri tətbiq olunmalıdır. Kadrlar, sadəcə, məmurlar deyil, bu sahəni bilən, bu sahənin içində olan şəxslər olmalıdır. Çünki din sahəsi spesifik sahədir. Səyyad müəllim təcrübəli insandır, 10 ildən artıqdır komitədə yüksək vəzifə tutur. Uzun illərə dayanan jurnalist və idarəçilik təcrübəsi var. Ancaq onu düşünürəm ki, əvəzedici olaraq təyin ediblər. Səyyad müəllim də din sahəsinin adamı deyil. Baxmayaraq ki, təcrübəlidir. Mən düşünürəm ki, din sahəsində ciddi problemlər var. Bəziləri açıq görünür. Bəziləri isə hələlik gözə dəymir, amma zamanla üzə çıxacaq. Buna görə də bu sahədə ciddi keyfiyyətə dəyişiklik edilməlidir. Baxaq görək, hakimiyyət bu işi kimə tapşıracaq”.
Hazırladı: Afaq MİRAYİQ
