Bakı açıq danışır, Paşinyan da, sülh müqaviləsi isə…
Ermənistanın baş naziri Nikol Paşinyan ilk dəfə olaraq açıq şəkildə bəyan edib ki, ölkənin yeni Konstitusiyasından Dağlıq Qarabağa dair ərazi iddialarını ehtiva edən müddəalar çıxarılacaq. Onun sözlərinə görə, bu, Ermənistanın müstəqillik bəyannaməsinə edilən istinadı da əhatə edəcək – sənəd ki, uzun illər Azərbaycanın ərazi bütövlüyünə qarşı iddiaların hüquqi və ideoloji əsası olub.
Paşinyan artıq yeni Konstitusiyanın hazırlanması prosesinə start verilməsi və sənədin ümumxalq referendumu ilə təsdiq olunması barədə göstəriş verib. Əgər əvvəllər Ermənistan rəhbərliyi bu məsələdə qeyri-müəyyənlik nümayiş etdirirdisə, indi baş nazir aydın şəkildə bəyan edir: Dağlıq Qarabağa iddialar simvoluna çevrilmiş istinad arxivə göndərilir.
Musavat.com xəbər verir ki, bunu politoloq Elçin Alıoğlu bildirib. O, Paşinyanın bu məsələdə qərarlı olsa da, nəticənin xalqın iradəsindən asılı olduğunu vurğulayıb:
“Paşinyan hesab edir ki, son söz erməni xalqına məxsusdur-yeni əsas qanun layihəsi 2026-cı ilin mayında keçiriləcək parlament seçkiləri ilə eyni gündə referendumda xalqın ixtiyarına veriləcək. Bu addım İrəvanın sülh prosesinə siyasi iradə göstərməyə hazır olduğunu göstərsə də, onun real nəticələrə çevrilməsi üçün hələ uzun yol var. Bakı tərəfi isə bu barədə açıq danışır: Prezident İlham Əliyev bildirib ki, Azərbaycanın səbrini sadəcə vədlərlə yoxlamaq olmaz-Bakı hüquqi təminatlı və rəsmi təsdiqlənmiş qərarlar tələb edir. Beləliklə, Ermənistanla sülh müqaviləsinin imzalanması ən azı bir il sonraya təxirə salınır”.
