Muğam yarışında qalmaqal – Xalq artistlərindən reaksiya
Mənsum İbrahimov: “Təxribatçılar region söhbəti edirlər”
Məlum olduğu kimi, Laçında IX “Muğam” televiziya müsabiqəsinin final mərhələsi baş tutub. Müsabiqənin final mərhələsində qaliblərin adı açıqlanıb və onlar mükafatlandırılıblar. 8-16 yaşında yeniyetmələr arasında birinci yerə Əhəd Ağayev, ikinci yerə Murad Nəbizadə, üçüncü yerə isə Kənan Tağızadə layiq görülüb.
16-30 yaşında gənclər arasında müsabiqədə birinci yerə Aytac Bəybalayeva, ikinci yerə Nərmin Mirzəyeva, üçüncü yerə isə Rəis Niftəliyev seçilib. Müsabiqənin münsiflər heyətinin kürsüsündə xalq artistləri Mələkxanım Əyyubova, Mənsum İbrahimov, Nəzakət Teymurova, Vamiq Məmmədəliyev, əməkdar mədəniyyət işçisi İlqar Fəhmi əyləşib.
Lakin IX “Muğam” televiziya müsabiqəsinin nəticələri bəzi iştirakçılar tərəfindən narazılıqla qarşılanıb. Kənan Novruzov mükafatlandırılma mərasimində ona təqdim olunan diplomu qəbul etməyib. Daha sonra isə ona qarşı haqsızlıq edildiyi barədə açıqlama verib. Digər narazı iştirakçı Aycan Şükürlü isə etirazını videomüraciətlə bildirib və nəticələrə yenidən baxılmasını istəyib.
Etirazlara müsabiqənin münsiflərindən biri olan Xalq artisti Səkinə İsmayılova da qoşulub.
S.İsmayılova Bakupost.az-a açıqlamasında deyib: “Mən IX ”Muğam” televiziya müsabiqəsində münsiflərin qərarları ilə razılaşmıram, heç vaxt da razılaşmayacağam”.
“Bildiyiniz kimi, mən finalda iştirak etmədim. Qərarı oradakı münsiflər veriblər. Hər halda mən finalda münsif olsaydım, nəticə başqa cür olardı. Mən olsaydım, var gücümlə çalışıb haqq-ədaləti bərpa edərdim”, – deyə Xalq artisti bildirib.
Münsiflərdən biri Xalq artisti Mələkxanım Əyyubova Modern.az-a açıqlamasında müsabiqə ilə bağlı yayılan fikirlərə münasibət bildirib. “Verilişə baxan, müsabiqədə iştirak edənlər, insafları varsa, özləri də təsdiqləyər ki, indi etiraz edənlər əvvəl çox zəif idi, hətta oxuyan zaman qışqırdıqları üçün bunu onlara irad bildirmişəm. Kənan Ağdamda oxuyanda səsi qırıldı, oxuya bilmədi. Gərək biz onu həmin vaxt çıxarardıq, amma biz insaflı yanaşdıq, ona güzəşt etdik. İndi onların etdiyi ayıbdır. Bütün müsabiqə boyu onlara güzəşt etmişik, indi güzəştlərimizi də bizə irad bildirirdilər. Güzəşt etməsəydik, onda da irad bildirəcəkdilər ki, niyə 2 həftəyə bu adamı çıxardın. Biz görürdük ki, indi oxuya bilməsələr də, ustad kimi onlara yol göstərək, istedadları üzə çıxsın. Onlara iradlarımızı deyəndən sonra yenə də qiymətlərini yüksək verirdik, açıqlayırdıq ki, bu səhvlər düzələndir”.
Müsabiqədə münsif kürsüsündə oturan Xalq artisti Nəzakət Teymurova isə axşam.az-a açıqlamasında bildirib ki, müsabiqə çox şəffaf keçib, Kənanın hərəkəti isə düzgün olmayıb:
“Bu, Kənan üçün böyük uğurdur ki, 200 insan içindən seçilərək 20-liyə düşüb. Bunun özü bir qalibiyyətdir. Əsas onun özündən soruşun, hansı yeri tutmaq istəyirdi? Yeddiliyin içərisindən ən güclülər seçilməli idi. Ən güclü üç iştirakçını biz qalib etməli idik. Münsiflərin qərarı ilə ən güclülülər ilk üçlükdə yer aldı.
Diplomantlar arasında yer almaq da Kənan üçün böyük uğurdur. Hamı qalib olmaq istəyir. Amma muğam sənəti ağır sənətdir. Yəqin ki, onun da digər ifaçılar kimi çatışmayan nələrisə oldu. Çünki hər kəsin istedadı ümumi olaraq hamı tərəfindən dəyərləndirildi”.
Qeyd edək ki, hər dəfə muğam müsabiqələrinin nəticələri açıqlandıqdan sonra müəyyən etirazlar olur. Bu, artıq ənənəyə çevrilmiş haldır. Kimlərsə münsiflərin qərarını obyektiv hesab etmir, kimlərsə favoritlərinin qalib gəlmədiyini iddia edir. Lakin bu dəfə vəziyyət bir qədər fərqlidir – etirazların daha geniş vüsət alması, üstəlik, tanınmış sənət adamlarının da bu müzakirələrə qoşulması qalmaqalı böyüdüb.
Xüsusilə də Xalq artisti Səkinə İsmayılovanın etirazlara qoşulması həm ictimaiyyətin, həm də sənət camiəsinin diqqətini bu məsələyə yönəldib. Əgər əvvəlki illərdə əsasən sosial şəbəkələrdə səslənən fərdi şikayətlər fonunda vəziyyət tez unudulurdusa, bu dəfə sənət aləminin nüfuzlu adının reaksiyası geniş rezonans doğurub.
Bəs nə baş verir?
Məsələ ilə bağlı müsabiqənin münsiflər heyətinin üzvü, Xalq artisti, muğam ustadı Mənsum İbrahimov “Yeni Müsavat”a danışıb. Xalq artisti qeyd edib ki, əvvəlki illərdə yerləri bölüşdürürdük, heç kim tam kənarda qalmırdı: “Bu dəfə isə 7 finalçı var idi, amma cəmi 3 yer ayrılmışdı. Təbii ki, 3 yeri 7 nəfər arasında bölmək mümkün deyil və kənarda qalan tərəf narazılıq edir.
Narazılıq edən Kənan Novruzov mənim tələbəm olub. Əgər deyilən kimi, mən “öz tələbəmə yer verirdimsə”, o zaman məhz Kənana yer verərdim. O, 4 il mənim tələbəm olub, son iki ildə isə tələbəm Bəyimxanım Vəliyevanın tələbəsi idi. Yəni, mənim öz tələbəm olmuş bir ifaçıdan söhbət gedir.
İkinci narazılıq edən Aycan Şükürlü isə mənim tələbəm Təyyar Bayramovun tələbəsidir. Yəni hər iki ifaçı bizə yaxın insanlardır. Sadəcə, ortada müəyyən bir dəstə adam var ki, region söhbəti etməyə başlayırlar.
Bir məqamı da qeyd edim: sonuncu müsabiqədə yer tutanlar arasında Qarabağdan olan ifaçı yoxdur. Bu dəfə Bakı və Şamaxı ifaçıları qalib gəldi. Bunun isə mənim üçün heç bir fərqi yoxdur. Mənim üçün əsas olan istedaddır – ifaçı Azərbaycanın hansı bölgəsindən olur-olsun. Təəssüf ki, bəzi təxribatçı qüvvələr və onların trolları süni şəkildə region mövzusunu gündəmə gətirirlər. Bu, çox ayıb məsələdir. Biz hamımız azərbaycanlıyıq və eyni amal üçün çalışırıq”.
Mənsum İbrahimov müsabiqənin tam şəffaf şəkildə keçdiyini deyib:
“Müsabiqə boyu ballar hesablanır, eyni zamanda münsiflər arasında müzakirə aparılır. Orada 6 nəfər münsif olub və yekun nəticə səs çoxluğu ilə müəyyən edilib. Yəni proses tam normal qaydada gedib. Narazılıq edən iştirakçıların müsabiqə boyu səhvləri olub, biz onlara dəfələrlə güzəşt etmişik. Bəzən onların kənarda qalmaq təhlükəsi vardı, amma biz humanistlik göstərərək çıxarmamışıq və çalışmışıq ki, finala daha çox uşaq keçsin. Finala çıxan bütün ifaçılar istedadlı idilər və hər biri yer almağa layiqdir. Lakin qeyd etdiyim kimi, yalnız 3 yer ayrıldığı üçün digərləri kənarda qaldı”.
Xalq artisti həmkarı Səkinə İsmayılovanın da mövqeyinə münasibət bildirib:
“Səkinə İsmayılova bizim çox dəyərli sənətkarımızdır. Təəssüf ki, səhhəti ilə bağlı finalda iştirak edə bilmədi. Biz də çox istərdik ki, o bizimlə olsun. Onun fikirlərinə gəlincə, əlbəttə, hər bir münsifin öz mövqeyi və yanaşması ola bilər, mən bunu normal qarşılayıram. Ancaq bu məsələdən istifadə edib təxribatçı addımlar atmaq istəyənləri qınayıram. Onlar belə şeylərə yol verməməlidirlər”.
Xalidə GƏRAY,
“Yeni Müsavat”
