Dövlət Miqrasiya Xidmətinin rəisi Vüsal Hüseynov jurnalistlərlə keçirilən görüşdə Yüksəkixtisaslı Miqrant Proqramı barədə məlumat verib.
ARANTV.AZ-ın xəbərinə əsasən, DMX rəisi qeyd edib ki, Yüksəkixtisaslı Miqrant Proqramı yüksəkixtisaslı əcnəbilərin və vətəndaşlığı olmayan şəxslərin Azərbaycan Respublikasında haqqı ödənilən əmək fəaliyyətinə cəlb edilməsi imkanlarının genişləndirilməsi məqsədilə Azərbaycan Respublikası Prezidentinin 2024-cü il 6 iyun tarixli Sərəncamı əsasında yaradılıb:
“Proqram yüksəkixtisaslı miqrantlara və onların ailə üzvlərinə Azərbaycana gəlmək, ölkədə yaşamaq və əmək fəaliyyəti ilə məşğul olmaq üçün geniş imkanlar yaradır. Proqram iştirakçılarının müraciətlərinin qəbulunun və cavablandırılmasının “bir pəncərə” prinsipi əsasında təmin edilməsi məqsədilə pass.gov.az Yüksəkixtisaslı miqrant Portalı yaradılıb. Proqramda iştirak etmək istəyən əcnəbilər bu portal vasitəsilə qeydiyyatdan keçə, təhsil, iş təcrübəsi və digər məlumatlarını təqdim etməklə elektron formada müraciət edə bilərlər.
Portal, həmçinin Azərbaycan Respublikası ərazisində fəaliyyət göstərən sahibkarlıq subyektləri (işəgötürənlər) üçün də bir sıra imkanlar yaradır. İşəgötürənlər portalda qeydiyyatdan keçməklə ehtiyac duyulan sahələr üzrə əcnəbi mütəxəssislərin mövcudluğu barədə sorğu edə bilərlər. Sorğuda qeyd olunan meyarlara uyğun olan və fərdi məlumatlarının işəgötürənlərlə paylaşılmasına razılıq verən əcnəbi mütəxəssislər barədə məlumatlar işəgötürənlərə təqdim edilir. Bundan başqa, portal istifadəçiləri proqramın şərtləri və tələbləri, proqram iştirakçılarını qiymətləndirmə meyarları, Azərbaycan və digər faydalı mövzular haqqında məlumatlarla təmin olunur”.
Vüsal Hüseynov diqqətə çatdırıb ki, proqram üzrə 38 qalib seçilib.
Nigar Həsənli
Musavat.com
