“Azərbaycanın gələcəyi olan gənclərimiz bu çətin dönəmdə – dünyanı bürüyən, birgə səylərin göstərilməsinə çağırış olan COVID-19 pandemiyası ilə mübarizə zamanında da dövlətimizin yanında oldular. 2020-ci ilin isə “Könüllülər ili” adlandırılması da heç təsadüfü deyildi. Milyonlarca insanın ölümünə səbəb olan və onlarca ölkənin səhiyyə sistemini məhv edən pandemiya dönəminin başladığı gündən bu günə kimi gənclərimiz öz canlarını düşünmədən ölkəsi, xalqı, milləti üçün könüllülük proqramı çərçivəsində bir çox yardım layihələri həyata keçirdilər.”
Bu fikirləri “İki sahil”ə açıqlamasında Yeni Azərbaycan Partiyası Nəsimi rayon təşkilatı Azərbaycan Dillər Universiteti ərazi ilk patriya təşkilatı Gənclər Birliyinin sədri, YAP Nəsimi Rayon təşkilatı Gənclər Birliyinin sədr müavini Rəna Süleymanlı söyləyib.
R.Süleymanlı qeyd edib ki, 2020-ci il Azərbaycan tarixində təkcə pandemiya ilə mübarizə dönəmi kimi deyil, həm də 30 ilə yaxın düşmən tapdağı altında olan torpaqlarımızın işğaldan azad edildiyi bir il kimi də yaddaşlarda yer aldı: “Vətən müharibəsi Azərbaycan gənclərinin necə mərd olduğunu, ölümün gözünün içinə dik baxdıqlarını, şücaətlərilə düşmənin ən qorxulu yuxularına necə çevrildiyini tarix öz silinməz səhifələrinə incə naxışlarla yazdı. Xüsusilə də Şuşa döyüşlərini… “Belə döyüş, dövlət, vətən sevgisi görən olubmu, demək çətindir?! Dağ yuxarı, şəhidi çiynində, döyüşə – döyüşə qan, tər içində qalxırdı Azərbaycan ordusu. Nə yaralını, nə şəhidi əldən buraxırdılar. Nəfəs almadan Şuşaya çıxdılar…”- Rusiya medialarından birində qeyd olunan bu ifadə Azərbaycan ordusunun Şuşa döyüşlərində göstərdiyi cəsurluq və şücaətlərin təkcə Azərbaycan tarixinin yaddaşından deyil, bir çox dünya ölkələrinin tarixinin yaddaşından silinməcəyinin bir göstəricisidir.”
Həmsöhbətimiz əlavə edib ki, bu gün respublikamızda yüksək intellektual səviyyəyə, vətənpərvərlik hissinə, milli düşüncəyə malik olan gənclər formalaşıb: “Azərbaycan gənclərinin dövlətimizin ictimai-siyasi həyatında rolu hər gün artmaqdadır və hazırda respublikada mövcud olan gənclər təşkilatları dövlətin yaratdığı şərait sayəsində fəaliyyət göstərir. Məhz dövlət başçısının gənclərə dəstək və diqqət göstərməsinin nəticəsində Azərbaycan gəncliyində öz gücünə, istedadına inam hissi artıb. Xüsusilə də, Ermənilər kimi dezinformasiya yaymaqla dünyanı öz yalanlarına inandıran bir millətlə arxa cəpədə dezinformasiyaya qarşı informasiya yayaraq ön cəbhədəki qələbəni arxa cəbhədə də qorudular. Rəhbərlik etdiyim Gənclər Birliyi də bir çox layihələr həyata keçirdilər və sosial şəbəkələrdə gənclər ilə birlikdə saat neçə olmağından asılı olmayaraq ermənilərin bütün dezinformasiyalarını məhv edən informasiya yaydı. Bu gün həm ön cəbhədə, həm də arxa cəbhədə çalınan bu qələbə Azərbaycan gənclərinin hər istiqamətindəki gücünün ən bariz nümunəsi idi.”
Rəna Süleymanlı əlavə edib ki, indi biz pandemiya dönəmində yaşayırıq və heç bilmirik ki, bu vəziyyət dünyada nə qədər hökm sürəcək: “Bu pandemiya təkcə insan orqanizminə düşüb yayılan bir virus olmadı, eyni zamanda dünyanın bütün təhsil, səhiyyə, sosial-iqtisadi sisteminə düşüb zərbələr vuran bir virus oldu. Ancaq unutmamalıyıq ki, dünyada koronavirus infeksiyasının fəsadlarının dərinləşməsinə baxmayaraq, ölkəmizdə heç bir sahədə, o cümlədən gələcəyimiz olan gənclərin təhsilində durğunluq müşahidə olunmur. Distant təhsilin xarakterik xüsusiyyətlərinə çeviklik, modulluluq, iqtisadi səmərəlilik, müəllimin yeni rolu, təhsilin keyfiyyətinə xüsusi nəzarət, müasir texnologiyalardan istifadə və sair kimi amillərin aid olduğunu da önə çəksək, bu gün Azərbaycan gəncliyinin inkişafı üçün hər cür şəraitin yaradıldığını deyə bilərik. Əsas olan budur ki, gənclərimiz bu şəraitdən maksimum istifadə etsin, bilik və bacarıqlarını ortaya qoysun, təhsilin-elmin-iqtisadiyyatın vəhdətinin yaradılmasına öz töhfələrini versinlər.”
Həmsöhbətimiz yekunda fikirlərini bildirdi: “Bir gənc olaraq bütün gənclərdən tək istədiyim budur. Unutmayaq, biz Azərbaycanın gələcəyiyik, biz özümüzü nə qədər inkişaf etdirsək, pandemiyanın gətirdiyi daxili ruh düşkünlüyünə düşmədən hədəflərimiz üçün nə qədər mübarizə aparsaq Azərbaycan Respublikasının gələcəyi bir qədər parlaq olacaq! Biz gənclərin gələcəyi Azərbaycanın gələcəyidir!”
