Prezident İlham Əliyevin rəhbərliyi ilə ölkəmizdə idmanın bütün sahələrinin inkişafı üzrə o cümlədən, idmançıların yüksək səviyyədə qayğı ilə əhatə olunması və idman komplekslərinin müasir tələblərə cavab verəcək səviyyədə qurulması üçün xeyli işlər görülmüşdür. Bu gərgin əməyin nəticəsidir ki, Azərbaycan bu gün dünyada idman ölkəsi kimi tanınaraq böyük nüfuz qazanmışdır. Respublikamızın bütün bölgələrində müasir Olimpiya İdman kompleksləri tikilib istifadəyə verilmiş, idmanın əlçatanlılığının artırılması məqsədilə bir çox addımlar atılmışdır. Eyni zamanda, bu gün ölkəmizdə çox saylı idman mərkəzləri uğurla fəaliyyət göstərməkdədir. Bakı Olimpiya Stadionu, Milli Gimnastika Arenası, Bakı Su İdmanı Sarayı və digər möhtəşəm idman obyektləri bunun göstəricisidir. Bütün bunlar ölkəmizi beynəlxalq yarışların, dünya çempionatlarının keçirilməsi üçün əlverişli məkana çevirmişdir. Respublikamızda I Avropa Oyunları, IV İslam Həmrəyliyi Oyunları, “Formula-1” Bakı Qran-prisi, müxtəlif idman növləri üzrə dünya və Avropa çempionatları, digər möhtəşəm yarışlar yüksək səviyyədə təşkil olunaraq keçirilmişdir. Atletlərimiz çıxış etdikləri son 7 olimpiadada möhtəşəm tarixi zəfərlərə imza ataraq ümumilikdə 53 medal qazanmıışdr. Bütün bu uğurlar Azərbaycan Prezidentinin idmana göstərdiyi böyük diqqət və qayğı sayəsində mümkün olmuşdur.
Ölkə başçımız idmanı sadəcə ölkəmizi dünyada təbliğ etmək üçün vasitə olaraq yox həm də, sağlam cəmiyyətin formalaşması və gənclər arasında vətənpərvərlik hisslərinin gücləndirmək üçün bir vasitə olaraq qəbul edir. Sitat: “Hər bir idman qələbəsi, xüsusilə, mötəbər beynəlxalq yarışlarda qazanılmış qələbə ölkəmizdə milli qüruru, milli ruhu yüksəldir. Ona görə idmanın hər bir ölkənin həyatında çox önəmli rolu var”. Bəli, idman ilk olaraq fiziki cəhətdən sağlam gəncliyin formalaşması deməkdir ki, bu da hər ölkənin öz gələcəyini təmin etməsi baxımından çox böyük əhəmiyyətə malikdir. Yalnız fiziki və mənəvi baxımdan sağlam gənclik öz ölkəsinin azad, firavan gələcəyində rol oynaya bilər. Rusiyalı məşhur idmançı Aleksey Volkov bu xüsusda qeyd edir ki, idman bu gün ucuz mədəniyyət və pis vərdişlərin istilasına qarşı durmağa qadir olan əsas sosial amildir. Digər bir tərəfdənsə, idman mühüm sosial fenomen kimi cəmiyyətin bütün təbəqələrini ortaq bir müstəvidə birləşdirərək, cəmiyyətin vətənpərvərlik hisslərinin alovlanmasına şərait yaradır. Yəqin ki, hər birimiz 44 günlük Vətən müharibəsindən qısa bir müddət sonra aparıcı şahmatçılarımızdan biri olan Teymur Rəcəbovun erməni rəqibi Levon Aronyanı məğlub etməsini və dərhal sonra kövrəlməsini xatırlayırıq. Ya da məşhur yunan-roma güləşçilərimizdən biri olan Rəsul Çunayevin erməni rəqibi üzərində cəmi 23 saniyədə əldə etdiyi qələbədən sonra hərbi salam verdiyi anları üzərindən illər keçsə də unuda bilmirik. Beləliklə, əminliklə demək olar ki, idman xalqın, xüsusilə də gənclərin vətənpərvərlik ruhunda yetişməsi üçün ən effektiv metodlardan biridir. Dövlət başçımızın idmanla bağlı daha bir sitatını xatırlatmaq istərdim: “İdmanın inkişafı və idman nailiyyətləri təkcə ölkəmizi dünyada təbliğ etmir, gücümüzü göstərmir, eyni zamanda, cəmiyyətdə vətənpərvərlik hisslərini gücləndirir”. Bu sözləri ölkə başçısı Macarıstanda keçirilmiş Güləş üzrə Avropa çempionatında iştirak edən Azərbaycan millisinin üzvlərini qəbul edərkən söyləyib. 08 aprel 2022-ci il tarixli bu görüş bir çox maraqlı anlarla yaddaqalan idi.
Məlumat üçün qeyd edək ki, Macarıstanın paytaxtı Budapeştdə keçirilən Avropa çempionatında güləşçilərimiz 16 medal qazanaraq Azərbaycanın idman şöhrətini bir daha yüksəklərə qaldırdılar. Sevindirici haldir ki, yığmamız böyük bir uğura imza ataraq tarixində ilk dəfə komanda hesabında Avropada birinci yeri tutdu və bu onu göstərir ki, güləşdəki ənənələrimiz yaşayır, güclü gənc nəsil yetişir. Əldə olunan uğurlar ölkəmizin və idmanımızın beynəlxalq nüfuzunu hər keçən gün daha da artırır. Şübhə yoxdur ki, müzəffər ölkəni və qalib xalqı təmsil etmək idmançılarımız üçün yeni stimul mənbəyidir. Əminik ki, idmançılarımız növbəti yarışlarda da möhtəşəm qələbələri ilə yeni tarix yazacaqlar. Onlar dövlət başçısının yüksək diqqət və qayğısını, xalqımızın inamını doğruldacaq, son ana qədər əzmkarlıqla mübarizə apararaq himnimizi səsləndirəcək, müqəddəs bayrağımızı daim yüksəklərə qaldıracaqlar.
Emin Sarıyev,
Pirallahı Rayon İcra Hakimiyyəti Başçısı Aparatının Sənədlərlə və vətəndaşların müraciətləri ilə iş şöbəsinin əməkdaşı
