DİN: “Hava şəraiti ilə əlaqədar ölümlə nəticələnən hadisə qeydə alınmayıb” – YENİLƏNİB + FOTO
Daxili İşlər Nazirliyinin (DİN) əməkdaşları respublikanın bütün ərazilərində hava şəraiti ilə əlaqədar gücləndirilmiş rejimdə əlavə heyətlə xidmətini davam etdirir.
DİN-in Mətbuat Xidmətindən verilən məlumata görə, polis əməkdaşları tərəfindən həyata keçirilən qabaqlayıcı tədbirlər səmərəli olub:
“Ölkə ərazisində hava şəraiti ilə əlaqədar ağır, yaxud ölümlə nəticələnən hadisə qeydə alınmayıb.
Son sutka ərzində DİN-in “102 Zəng Mərkəzi”nə vətəndaşlar tərəfindən hava şəraiti ilə bağlı 3 765 çağırış daxil olub və kömək istənilib. Hər bir çağırış operativ qaydada yerlərdə xidmət edən əməkdaşlara ötürülməklə vətəndaşlara zəruri köməkliklər göstərilib. Çağırışlar əsasən respublikamızın magistral yollarında, xüsusilə dağlıq ərazilərdə hərəkət edən şəxslərlə bağlı olub. Sağlamlıq vəziyyətində problem yaranan şəxslərin polisin xidməti avtomobilləri ilə yaşayış yerlərinə çatdırılması təmin edilib”.
“Bir daha sürücülərdən xahiş edirik sürət həddini hava şəraitinə uyğun tənzim etsinlər, ötmə əməliyyatından və qəfil manevrlərdən çəkinsinlər. Təcrübəsi az olan sürücülərin buz bağlayan yollarda avtomobil idarə etmələri tövsiyə edilmir”, – məlumatda deyilir.
Hazırda DİN əməkdaşlarının ölkə ərazisində fasiləsiz rejimdə xidməti davam edir.
11:14
Paytaxt yollarının son vəziyyəti açıqlanıb.
Bu barədə Daxili İşlər Nazilliyi (DİN) məlumat yayıb.
Bildirilib ki, Bakı-Sumqayıt şosesi, “20 Yanvar” metrostansiyası istiqamətində və Rövşən Cəfərov küçəsi, “20 Yanvar” metrostansiyası istiqamətində sıxlıq müşahidə olunur.
10:46
Bakı şəhər Dövlət Yol Polisi (DYP) İdarəsi qarlı hava ilə bağlı sürücülərə müraciət edib.
ARANTV.AZ xəbər verir ki, BDYPİ sürücülərdən meydana gələ biləcək qəzaların və digər xoşagəlməz halların qarşısının alınması üçün qabaqlayıcı tədbirlər görməyi, nəqliyyat vasitələrinin texniki sazlığından əmin olmağı, yola çıxmazdan əvvəl avtomobilin şüşə silgəclərinin və şüşəyuyanların, habelə xarici işıq cihazlarının işlək vəziyyətdə olmasına nəzarət etməyi, sürət həddini yol və hava şəraitə uyğun seçməyi, zərurət olmadan ötmə əməliyyatı aparmaqdan, qəfil manevr və kəskin tormozlamadan çəkinməyi xahiş edir.
09:36
Paytaxt yollarının son vəziyyəti açıqlanıb.
Bu barədə Daxili İşlər Nazilliyi (DİN) məlumat yayıb.
Bildirilib ki, hazırda paytaxt yollarında sıxlıq müşahidə olunmur.
Qeyd edək ki, Bakıda ötən gündən etibarən qarlı hava şəraiti müşahidə olunur. Gecə saatlarında paytaxtın bəzi yollarında tıxac yaranmışdı.
09:18
Qarlı hava şəraiti ilə bağlı Baş Dövlət Yol Polisi İdarəsi piyadalara müraciət edib.
Bu barədə Oxu.Az-a Daxili İşlər Nazirliyinin (DİN) Mətbuat Xidmətindən məlumat verilib.
Müraciətdə deyilir:
“Əziz piyadalar:
– paytaxt ərazisində sürüşkən mərmər səkilərdə hərəkət edərkən diqqətli olun;
– yollarda avtomobilin olmadığından tam əmin olduqdan sonra yolu qarşıdan-qarşıya keçin;
– qarlı-buzlu havalarda hündürdaban ayaqqabı geyinməyin. Ayaqqabının sürüşkən olmadığına və rahat olduğuna fikir verin;
– çöldə olarkən əlinizi cibinizə qoymayın. Çünki yıxıldıqda əlinizlə müvazinəti tənzimləyə bilərsiniz;
– balaca və asta addımlar atın;
– pilləkənləri çıxıb düşərkən ayağınızı pilləkənə tam qoyduğunuza və sürüşmədiyinə tam əmin olun;
– pilləkənlərdən çıxıb düşərkən tutacaqdan istifadə edin;
– yumşaq qar altında bərk buzun ola biləcəyini unutmayın, qara ayaq basarkən ehtiyatlı olun;
– bel, boyun, baş üstə yıxılan adamı tərpətmədən təcili tibbi yardım çağırın”.
