Soyuq havalar insan orqanizminin enerjiyə olan tələbatını artırır. Xüsusilə qarlı-şaxtalı günlərdə bədən temperaturunu qorumaq üçün qidalanmaya xüsusi diqqət yetirmək vacibdir.
Bəs belə havalarda necə qidalanmalıyıq?
Mövzu ilə bağlı diyetoloq-həkim Ləman Süleymanova Musavat.com-a danışıb:
“İnsan orqanizmi hər fəslə uyğun olaraq öz balansını yeniləyir. Xüsusilə payız və qış aylarında havalar soyuduqca orqanizmin enerjiyə olan tələbatı artır. Bunun əsas səbəbi immun sistemimizin ətraf mühitin təsirlərinə qarşı mübarizə aparmasıdır. Beyin immunitet sistemi ilə əlaqə quraraq orqanizmin müdafiə mexanizmlərini aktivləşdirir və bunun üçün əlavə enerji tələb olunur. Qış fəslində orqanizmin sağlam qalması üçün əsas məqsəd zülal, yağ, karbohidrat, vitamin və minerallarla zəngin qidalar qəbul etməkdir. Soyuq havalarda bədənimizi güclü saxlamaq və immuniteti dəstəkləmək üçün balanslı və rejimli qidalanma vacibdir. Günün ən vacib yeməyi səhər yeməyidir. Xüsusilə qış aylarında səhər menyosu enerji ilə zəngin olmalıdır. Həftədə ən azı 4 gün səhər yeməyində yumurta olmalıdır. Çünki yumurta orqanizm üçün lazım olan zülal və digər vacib elementlərlə zəngindir”.
Diyetoloq-həkim qeyd edib ki, ət və balıq məhsulları soyuğa qarşı effektiv müdafiədir:
“Qış aylarında qırmızı ət çox vacibdir, çünki dəmirin əsas mənbələrindən biridir. Bu, xüsusilə immun sistemi zəif olan, anemiyadan əziyyət çəkən və ya qan azlığı olan insanlar üçün önəmlidir. Uşaqların və yaşlıların menyusunda qırmızı ətə yer verilməlidir.
Bundan əlavə, balıq məhsulları da qış rasionunda olmalıdır. Balıq əti və dəniz məhsulları Omeqa-3 ilə zəngindir və bu, orqanizm üçün çox əhəmiyyətlidir. Qış aylarında Omeqa-3 daha yaxşı mənimsənilir və immun sistemini gücləndirir. Qışın ən faydalı meyvələri sitrus meyvələridir (portağal, naringi, limon). Onların tərkibindəki C vitamini orqanizmin immun sistemini möhkəmləndirir, qan dövranını yaxşılaşdırır və soyuqdəyməyə qarşı qoruyucu rol oynayır.
Qış fəslində meyvələri günün ilk yarısında – saat 5-ə qədər yemək daha faydalıdır. Çünki bu saatdan sonra meyvələrin tərkibindəki təbii şəkərlər orqanizmdə enerjini aşağı sala və həzm prosesini çətinləşdirə bilər. Tərəvəzlərə gəlincə, axşam yeməklərində yüngül tərəvəz şorbaları və ya bişmiş tərəvəzlərə üstünlük vermək tövsiyə olunur. Tərəvəzlər liflə zəngindir və bağırsaqların sağlam fəaliyyətini dəstəkləyir”.
Ləman Süleymanova bildirir ki, qış fəslində yağlı yeməklərdən tam imtina etmək düzgün deyil:
“Yağlar bağırsaq mikroflorasının normal fəaliyyəti üçün vacibdir və metabolizmin sabit işləməsinə kömək edir. Lakin burada əsas məsələ düzgün yağları seçməkdir – zeytun yağı, kərə yağı kimi təbii yağlara üstünlük verilməlidir.
Yağsız qidalanma orqanizmiz “ac” qoyur və nəticədə bədən zərərli yağları ehtiyatda saxlamağa başlayır. Bu da xolesterolun yüksəlməsinə və daxili orqanların yağlanmasına səbəb ola bilər. Ona görə də, yağlı yeməkləri balanslı şəkildə qəbul etmək vacibdir.
Qış fəslində düzgün qidalanma orqanizminizi gücləndirir, immun sisteminizi qoruyur və sizi soyuqdəymə və digər xəstəliklərdən müdafiə edir. Səhər yeməklərinizi zəngin edin, qırmızı ət və balıq məhsullarını menyunuza daxil edin, sitrus meyvələrindən faydalanın və yağlı qidaları ağılla seçin.
Qış aylarını sağlam və enerjili keçirmək üçün qidalanmanızı balanslı və şüurlu şəkildə planlayın”.
