ABŞ-da erməni lobbisinə bağlı, yaxud hələ də mağara səviyyəli “xristian təəssübkeşliyi”nin əsiri olan qurumların anti-Azərbaycan demarşları səngimir. İndi də xəbər gəlib ki, ABŞ-ın Beynəlxalq Dini Etiqad Azadlıqları Komissiyası (USCIRF) iyunun 5-də Azərbaycandakı vəziyyətlə bağlı virtual dinləmələr keçirəcək və bu dinləmələrdə “erməni mədəni irsinin məhv edilməsi” məsələsinə də baxılacaq. USCIRF-in bəyanatında belə deyilir.
“Azərbaycan hakimiyyəti erməni mədəni irsini məhv edir, Dağlıq Qarabağdakı dini obyektlər təhlükə altındadır”, – deyə açıqlamada həyasızcasına iddia olunur. Ardınca bildirilir ki, Azərbaycanda ümumiyyətlə, dini etiqad azadlığı ilə bağlı vəziyyət guya narahatedicidir.
Sitat: “Fevral ayında USCIRF ölkədə dini etiqad azadlığının vəziyyətini araşdırmaq və dini icma nümayəndələri, hüquq müdafiəçiləri və hökumət rəsmiləri ilə görüşmək üçün Azərbaycana səfər edib. USCIRF 2025-ci il üçün illik hesabatında ABŞ Dövlət Departamentinə Azərbaycanı dini etiqad azadlığının ciddi pozuntularına görə Xüsusi Nəzarət Siyahısına daxil etməyi tövsiyə edib”.
Xatırladaq ki, USCIRF Dövlət Departamentindən ayrı, Birləşmiş Ştatlar hökumətinin guya müstəqil və məsləhətçi orqanı sayılır…
Əvvəla, “Dağlıq Qarabağ” anlayışı çoxdan mövcud deyil. Mövcuddursa da, yalnız tarix dərsliyində və tarix üçün. Keçmiş DQMV şəklində. Yəni öncə gedin BMT üzvü olan bir dövlətin suverenliyi, ərazi bütövlüyü və konstitusiya-unitar quruluşuna sayğılı olmağı öyrənin.
İkincisi, görəsən “erməni dini-mədəni irsi” nəyə deyir bu “ədalət” carçıları? Laçında işğal dövründə tikilmiş “kilsə”nimi? Hansını ki, Azərbaycan tam haqqına yerlə bir elədi. Eləcə də ərazilirimizdəki “mədəni-dini abidə” adı ilə inşa olunmuş digər qanunsuz obyektlər ləğv edilib.
Çünki bunu həm də beynəlxalq konvensiyalar tələb edir. Sadə səbəb: işğal etdiyin və etnik təmizləmə apardığın ərazini bu yolla legitimləşdirə bilməzsən! Yeri gəlmişkən, bütün səmavi dinlər məscid, kilsə və ya sinaqoq tikintisi zamanı o yerin halallığını almağı tələb edir. Qısacası, bu nağılları, yalan-böhtanları özünüzə saxlayın.
Üçüncü yandan, hər şey qırağa, məgər Bakıdakı erməni kilsəsinin necə qorunduğunu görmür yalançı dini etiqad “təəssübkeşləri”? Həqiqətən də Azərbaycanda dini tolerantlığa şübhə eləmək üçün ya gərək çox güclü fantaziya qabiliyyətin ola, ya elementar məntiq hissindən məhrum olasan, ya da əlbəttə, erməni çevrələrinə bağlılığın ola…
Guya xəbərləri yoxdur ki, erməni işğalı dövründə ən iyrənc vandallığa məhz Azərbaycanın dini-mədəni abidələri məruz qalıb. Guya bilmirlər ki, Qarabağda 67 məsciddən 65-ni dağıdan, quru divarları qalan “Allah evlərində” isə donuz, inək saxlayanlar erməni ikiayaqlı “xristianlar” olub. Hansı faktları ki, rəsmi Bakının çoxsaylı müraciətlərinə rəğmən, rəhbəri fransız və qatı türkofob olan YUNESKO bu günədək görməzdən gəlir, qeydiyyata almaq istəmir.
Odur ki, bəlkə dinləmələrdə Azərbaycanın yox, elə YUNESKO-nun məsələsini qoyasınız? Yaxud Ermənistan adlı qədim Türk yurdunda türk-mədəni irsinin necə vəhşicəsinə yox edilməsini gündəmə gətirəsinisiz? İradəniz, vicdanınız çatarmı?..
Zahid SƏFƏROĞLU
