Əmək və Əhalinin Sosial Müdafiəsi Nazirliyi, BMT-nin İnkişaf Proqramı və BMT-nin Əhali Fondu özəl sektor və dövlət şirkətlərinin nümayəndələri ilə birgə inklüziv əmək bazarının inkişafı, əlilliyi olan şəxslərin məşğulluq imkanlarının artırılması sahəsində növbəti addımları müzakirə ediblər.
ARANTV.AZ xəbər verir ki, bu gün Əmək və Əhalinin Sosial Müdafiəsi Nazirliyi, BMT-nin İnkişaf Proqramı, BMT-nin Əhali Fondu nümayəndələrini və ölkənin ən böyük özəl və dövlət şirkətlərinin 20-dən çox nümayəndəsini bir araya gətirən dəyirmi masa keçirilib.
“Əlilliyi olan Şəxslərin Məşğulluğu: İşəgötürən Təcrübələri” adlı tədbir “Əlilliyi olan Qadınların və Dağlıq Qarabağ Müharibəsi Veteranlarının Hüquqlarının və Rifahının Təmin Edilməsi” layihəsi çərçivəsində təşkil edilib. Azərbaycan Respublikasının Birinci vitse-prezidenti Mehriban Əliyevanın təşəbbüsü ilə icra edilən bu layihə Əmək və Əhalinin Sosial Müdafiəsi Nazirliyi tərəfindən maliyyələşdirilir, BMT-nin İnkişaf Proqramı və BMT-nin Əhali Fondu tərəfindən həyata keçirilir.
Tədbirin məqsədi əlilliyi olan insanların məşğulluğunun təminatı ilə bağlı ən yaxşı təcrübələri nəzərdən keçirmək, ölkədə əlilliyi olan şəxslər üçün daha yaxşı və daha çox iş və təhsil imkanlarının yaradılmasına dair gələcək birgə addımları müzakirə etmək olub.
Görüşün əsas nəticələrindən biri daha çox şirkətin əlilliyi müxtəliflik, istedad və yenilik mənbəyi kimi tanımağa başlaması olub. Vurğulanıb ki, şirkətlər əlilliyi olan şəxsləri işçi və rəhbər kimi işə götürmək, bununla rəqabət üstünlüyü qazanmaq üçün hər zamankından daha böyük imkanlara malikdirlər. Əlilliyi olan şəxslərin əmək bazarına çıxışı, onların səmərəli məşğulluğu özlərinin və ailələrinin rifahına və iqtisadi inkişaf proseslərinə töhfə vermələrinə imkan yaradır.
Dəyirmi masada qeyd olunan istiqamətdə birgə fəaliyyət müstəvisində görüləcək işlərə dair fikir mübadiləsi aparılıb.
“Əlilliyi olan Şəxslərin Məşğulluğu: İşəgötürən Təcrübələri” adlı tədbir “Əlilliyi olan Qadınların və Dağlıq Qarabağ Müharibəsi Veteranlarının Hüquqlarının və Rifahının Təmin Edilməsi” layihəsi bu kateqoriyalardan olan şəxslərə xüsusi diqqət yetirilməklə, onların hüquqlarının daha dolğun şəkildə reallaşdırılmasında Hökumətin səylərini dəstəkləmək məqsədi daşıyır. Bu da həmin insanların təhsilə, karyera inkişafı xidmətlərinə və iş imkanlarına daha yaxşı çıxışına şərait yaratmaqla onların sosial müdafiəsinin və rifahının yaxşılaşdırılması işlərinə dəstəkdir. Layihə çərçivəsində hədəf qrupları üçün V-Lab – Virtual Bacarıqların İnkişafı və Təlimi Laboratoriyası da yaradılıb. (http://www.vlaboratoriya.sosial.gov.az).
