Son günlər koronavirusa yoluxanların sayında artım müşahidə olunur. Belə ki, bu gün koronavirus infeksiyasına 576 yeni yoluxma faktı qeydə alınıb, 217 nəfər müalicə olunaraq sağalıb. COVID-19 üçün götürülən analiz nümunələri müsbət çıxan 6 nəfər vəfat edib. Bu gün hər kəsi maraqlandıran sual Azərbaycanda pandemiyanın nə zaman bitəcəyi ilə bağlıdır.
Bununla bağlı Sonxeber.az-a danışan tibb professoru Adil Qeybulla bildirib ki, yoluxanların sayının növbəti aylarda azalması insanların davranışından və görüləcək tədbirlərdən asılı olacaq:
“Bilirsiniz, yoluxanların sayının azalması insanların davranışından və dövlət tərəfindən görüləcək tədbirlərdən asılı olacaq. Bir tərəfdən deyirik ki, karantin rejiminə əməl edək. Digər tərəfdən də ictimai nəqliyyatda karantin qaydalarına əməl edilmir. Bu gün ictimai nəqliyyat yoluxma sayını artıran əsas mənbələrdən biridir.
Qarşıdan bayram gəlir. Gərək bayram günləri məsuliyyətli olaq. Qonaq gedəndə, iaşə müəssisələrində, restoranlarda və mağazalarda sosial məsafəni qorumalı, maskadan istifadə etməlidirlər. Təəssüf ki, bu gün də vecsiz yanaşanlar və burnu açıq gəzənlər var. Bütün bu məsuliyyətsizliklər yoluxanların sayını artırır. Belə olanda da dövlət məcbur olur ki, məhdudlaşmalarla bağlı qərar qəbul etsin. Karantin rejimindəki məhdudlaşmalar insanların psixologiyasına mənfi təsir edir. Bilirsiniz ki, vaksinasiya da başlayıb. Düşünürəm ki, pandemiya yaya qədər bitəcək”.
