Bizi zəfərə səsləyən o möhtəşəm Qələbə günümüzdən 11 ay ötür. 44 günlük Şanlı Zəfər salnaməmiz Ali Baş Komandanın əmri, vətənpərvər oğulların iradəsi, canı-qanı bahasına tariximizə qızıl hərflərlə yazıldı. Odlar yurdunun od parçaları – igidlərimiz oddan-alovdan keçərək hərəsi bir qəhrəman oldu, müqəddəs şəhidlik zirvəsinə ucaldılar, neçə-neçə vətən övladı sağlamlığını itirdi. Məhz onların sayəsində 30 il yağı düşmən tapdağında inləyən doğma el-obamıza, dədə-baba ocaqlarımıza qovuşduq. Vətən daşı olmağı bacaranların sayəsində biz bu gün dinc şəraitdə həyatımıza davam edirik.
Elə buna görə də dövlət qurumları idarə və müəssisələr şəhid ailələrinin və qazilərimizin xidmətində durmağı özlərinin müqəddəs borcu hesab edərək bu yöndə daha diqqətli olmağa çalışırlar.
Azərbaycan Dövlət Akademik Musiqili Teatrının kollektivi də bu xeyirxah və nəcib təşəbbüslərdə ön sıralardadır. Onlar müharibə dövründə könüllü olaraq əmək haqlarının bir hissəsini Silahlı Qüvvələrin Yardım Fonduna ianə edərək bu addımları ilə Silahlı Qüvvələrin Ali Baş Komandanı İlham Əliyevin və döyüşən ordumuzun yanında olduqlarını bir daha sübut etdilər. Teatrda çalışan gənclər də könüllü müharibəyə yollandılar. İşıqçı Əliağa Məmmədov döyüşlərdə qəhrəmancasına şəhid oldu, balet artisti Murad Ağayev qalib əsgər kimi doğma kollektivinə qayıtdı. Ölkə başçısının sərəncamı ilə Şəhid Əliağa Məmmədov ölümündən sonra “Vətən uğrunda” medalına layiq görülüb.
Qələbədən sonrakı dönəmdə də teatrın rəhbərliyi şəhid ailələrini və qazilərimizi diqqətdən kənarda qoymur. Şəhid Əliağanın bacısı Əzizə Abbasova teatra işə qəbul edilib, qazi Murad Ağayev vəzifəsində bir pillə də yüksəldilərək, eyni zamanda baletmeyster assistenti kimi fəaliyyət göstərəcək.
Vətən Müharibəsi iştirakçıları “Zəngilanın azad olunmasına görə” medalı ilə təltif olunan qazi Kənan Quliyev və 2-ci qrup əlil Anar Mehraliyev də teatrda işlə təmin olunublar.
