Pandemiya dövründə 4 istiqamətdə 12 sahə üzrə icra olunan sosial dəstək paketi ölkə əhalisinin 48 faizini və ya 4,8 milyon nəfəri əhatə edib
Son dörd ildə Azərbaycanda ölkə əhalisinin 40 faizindən çoxunu əhatə edən üç əsas sosial islahat paketi həyata keçirilib. Bu paketlər üçün ayrılan əlavə illik vəsait ümumilikdə 6 milyard manat və ya 3,5 milyard ABŞ dolları təşkil edib. Həmin dövrdə minimum əməkhaqqı orta hesabla 2,3 dəfə, minimum pensiya 2,2 dəfə, sosial müavinətlər 70%, ümumi sosial xərclər 2,5 milyard manat artıb. 2018-ci ilə nisbətən orta aylıq pensiyada orta hesabla 65 faiz, orta aylıq əməkhaqqında 35 faiz, median əmək haqqında 74 faiz, əməkhaqqı fondunda 2 dəfə artım baş verib.
Qeyd edilən dövrdə əmək müqavilələrinin sayının 30 faiz artması sosial sığorta daxil olmalarına da müsbət təsir göstərib. Son 4 ildə Əmək və Əhalinin Sosial Müdafiəsi Nazirliyinin (ƏƏSMN) tabeliyində Dövlət Sosial Müdafiə Fondunun (DSMF) gəlirləri 42 faiz və ya 1,5 milyard manat artıb. Dövlət büdcəsindən Fonda transfertlərin həcmi isə 14 faiz azalıb və bu il üçün həmin həcm 21,6 faiz təşkil edib. Həmin dövrdə DSMF tərəfindən sosial sığorta ayırmaları hesabına əhaliyə ödənilən sosial ödənişlərin həcmi 1,5 milyard manat artıb və Fondun xərclərinin 97 faizdən çoxunu sosial ödənişlər təşkil edib. ƏƏSMN tərəfindən 400 min nəfərə sosial müavinət, 300 min nəfərə təqaüd, 176 minə yaxın ailə üzvü olan 40 min ailəyə ünvanlı dövlət sosial yardımı verilib. Həmin yardımın hər ailəyə düşən orta aylıq məbləği son 4 ildə 2,5 dəfə artaraq 380 manata çatıb.
COVID-19 pandemiyası dövründə 4 istiqamətdə 12 sahə üzrə icra olunan sosial dəstək paketi ölkə əhalisinin 48 faizini və ya 4,8 milyon nəfəri əhatə edib.
Məqsədyönlü iqtisadi-sosial tədbirlər nəticəsində 2021-ci ilin sonuna Azərbaycan iqtisadiyyatı pandemiyadan əvvəlki göstəricilərini bərpa edib, ÜDM 5,6 faiz artıb, işsizlik səviyyəsi 7,2 faizdən 6 faizə enib.
2020-ci ildə 44 günlük müharibə nəticəsində Azərbaycan beynəlxalq səviyyədə tanınan ərazi bütövlüyünü bərpa edib. Postmüharibə dövründə ölkəmizdə müharibədən zərər çəkmiş mülki əhali, eləcə də şəhid ailələri və müharibədə yaralanmış insanlarla bağlı sosial dəstək tədbirləri 45 minə yaxın insanı əhatə edib, onlara 50 minə yaxın sosial xidmət göstərilib.
DOST konsepsiyası və onun sosial xidmətləri vətəndaş məmnunluğuna nail olunmasına şərait yaradıb. Həmçinin ƏƏSMN-in 174 xidmətindən 110-u rəqəmsallaşdırılıb, 46-sı hazırda proaktiv qaydada həyata keçirilir. Bu ilin sonuna kimi daha 50 xidmət elektronlaşdırılacaq. Nazirlik üzrə xidmətlərin 90%-nin e-platformaya keçirilməsi hədəflənir.
