“Heydər Əliyevin hakimiyyətə gəlməsi xalqımızın xilası oldu” – DEPUTAT DANIŞDI
“Ulu Öndər Heydər Əliyevin Azərbaycan xalqının qarşısında misilsiz xidmətləri olub. Həm Sovet, həm də müstəqillik dövründə məhz Ulu Öndərin sayəsində ölkəmiz talehyüklü məsələləri həll edə bilmişdi. SSRİ dövründə Azərbaycan zəif inkişaf etmiş aqrar bir ölkə idi. Ümummilli Liderin Azərbaycana rəhbərliyi dövründə qısa zaman kəsiyində sənayenin müxtəlif sahələri inkişaf etməyə başladı”. Bu sözləri SİA-ya açıqlamasında millət vəkili Elşad Mirbəşiroğlu bildirib.
Onun sözlərinə görə, ölkəmizdə həm səmərəli dövlət idarəçiliyinin yaradılması, həm də milli inkişaf prioritetlərinin formalaşdırılması baxımından Heydər Əliyevin atdığı addımlar, onun strateji baxışları təkrarsızdır: “Azərbaycan müstəqilliyinə dağılmış iqtisadi sistemlə qovuşdu. Bununla bərabər Ermənistan əsassız ərazi iddiaları irəli sürərək, torpaqlarımızı işğal etməyə başladı. Bu problemləri aradan qaldırmaq əvəzinə həmin dövrdə ölkədə AXC-Müsavat cütlüyünün hakimiyyət davası getməkdə idi. Ölkənin nəinki inkişafı haqqında düşünülürdü, Ermənistanın işğalçılıq siyasətinin qarşısının alınması istiqamətində heç bir ciddi addım atılmırdı. Heydər Əliyevin Azərbaycan xalqının təkidi ilə ikinci dəfə hakimiyyətə qayıtması, sözün əsl mənasında xalqımızın xilası oldu. Buna görə də Azərbaycan deyiləndə Heydər Əliyev, Heydər Əliyev deyiləndə isə Azərbaycan yada düşür. Bugünkü dövlətimizin var olmasının səbəbi məhz Ulu Öndər Heydər Əliyevdir. Ümummilli Lider hakimiyyətə gəldikdən qısa zaman sonra ölkədə siyasi sabitliyi təmin etdi”.
