“2 nəfərin ölümündə birbaşa Azərbaycan Dövlət Su Ehtiyatları Agentliyinin rəhbərliyi günhkardır” – Hafiz Hacıyev
Dünən Sabunçu ərazisində yağış suları ilə dolmuş tuneldə avtomobil batıb. 2 nəfər şəxs yağış sularında boğularaq ölüblər. Bəziləri bu hadisənin yağışın normadan artıq yağdığı üçün baş verdiyini deyir. Bəs əslində kimdir günahkar? Yağış yoxsa…
Mövzu ilə bağlı Müasir Müsavat Partiyasının sədri Hafiz Hacıyev Sonxeber.az – a danışıb:
Azərbaycanda əksər dövlət qurumları iflic haldadır:
“Azərbaycanda bu işə baxan əksər qurumlar iflic vəziyyətdədir. Çünki vəzifədəki şəxslər təcrübəsiz adamlardır. Vaxtilə həmin adamlar küçələrdə konfet satırdı. İndi isə başlarına şöhrət quşu qonub. Gəlib vəzifələrə oturublar və sözün əsl mənasında milləti qırırlar. Dünənki yağışda iki nəfərin ölməsi bizim üçün utancverici haldır. Azərbaycanda 2010-cu ildə kanalizasiyaların yenidən qurulması, su borularının yenidən çəkilməsi üçün dövlət büdcəsindən külli miqdarda pul ayrıldı. Həmin kommisiyanın sədri də Ramiz Mehdiyev təyin edildi. Amma ayrılan pullar yeyildi. Ona görə də bu gün harda nə baş verir bilən yoxdur. Azərsu bu işdə günahkardır. Bu barədə cinayət işi qaldırılmalıdır ki, ayrılan pullar hardadır? Niyə belə bir vəziyyət yaranıb? Düşünürəm ki, bu məsələ çox ciddidir”.
Vaxtında dövlətin pullarını yeyənlər indi həmin maliyyə ilə özlərinə xaricdə mülklər, villalar alıblar:
“Düzdür yollarımız təmir olunub. Amma altındakı kanalizasiyaların vəziyyəti nə yerdədir? İndi gedib məsul şəxsləri danışdırsaq bizi borclu çıxaracaqlar. Kanalizasiyalarımız SSRİ dövründən qalıb. Ona görə də bu vəziyyətdədirlər. Azərsunun məsul əməkdaşı özündə iradə tapmalıdır. Qorxmamalıdır kimin adamı olmasından asılı olmayaraq. Ortalığa çıxıb deməlidir ki, növbəti dəfə mən buna cavab verə bilməyəcəm. Bu hadisələr unudulmur. Əgər bu gün də olmasa bir neçə ildən sonra onlar törətdikləri üçün cavab verəcəklər. Bu gün təcrübəsiz, bacarıqsız, kimlərinsə tapşırığı ilə vəizfəyə gedən adamlar üzündən bunları yaşayırıq. Etdikləri üzə çıxanda isə hamısı xaricə qaçır. Vaxtında dövlətin pullarını yeyiblər. Həmin pullarla özlərinə xarici ölkələrdə mülklər, villalar alıblar. Bu mənim iddiam deyil. Hər şey göz önündədir. Dövlət başçısı təmir və abadlıq işləri üçün pullar ayırır. Bəs o pullar hara gedir? Kimdir buna nəzarət edən? Niyə bu məsələlərdə ortaya ciddi mövqelər qoyulmur? Məsələ çox ciddidir”.
Ölkədə rüşvətxorluq baş alıb gedir:
“Bəziləri yağış çox yağdı deyə bu hadisə baş verdi deyirlər. Anlamıram deməli daha çox yağış yağsa Bakı suyun altında qalacaq? Bu zəlzələ ya da daşqın deyil. Sadəcə yağışdır. Bir çox dövlət məmurları da bu hadisədən məsuldurlar. Necə olur ki, cərimələri artırmağı bilirlər. Həmin cərimələr hesabına evlənib balayına gedirlər. Amma xalqa xidmət eləmək vaxtı gələndə yoxa çıxırlar. Hər halda mən istəyərdim ki, bu məsələnin həlli üçün addımlar atılsın. Bunun üçün də savadlı kadrlar, mütəxəssislər lazımdır.
Mütəxxəsislər olmadıqca bu sahədə heç bir məsələ həllini tapmayacaq. Azərbaycanda əksər sahələrdə savadlı kadrlar yoxdur. Vəzifəli şəxslər uşaqlarını, qohumlarını vəzifəyə qoyurlar və deyirlər peşəkar kadrdır. Əgər bir işi bacarmırsansa çıxıb gedib oturmalısan evində. Sizi heç kim məcbur etmir ki, gəlib vəzifədə oturub axşama qədər katibələrinizin ətrini qoxlayasız. Bacarmırsızsa getməlisiz. Ölkədə heç nə normal deyil. Rüşvətxorluq baş alıb gedir. İnsanlar tuneldə yağış suyundan boğulub ölür. Bu böyük biabirçılıqdır”.
