Son illər ölkəmizdə də qəhvə mədəniyyəti sürətlə yayılır. Gənclər arasında isə latte, makyato və frappuçinolara vanil, karamel, fındıq kimi siropların əlavə olunması adi hal alıb. Kofe içmək təkcə zövq yox, həm də bir həyat tərzi simvoluna çevrilib. Lakin görünür, bu cazibədar içkilərin arxasında sağlamlıq üçün ciddi təhlükələr gizlənir.
Mütəxəssislər xəbərdarlıq edirlər ki, bu cür siroplar göründüyü qədər məsum deyil. Onların tərkibində yüksək miqdarda şəkər, süni aromatizatorlar, rəngləndiricilər və konservantlar mövcuddur. Bir porsiya sirop 5-7 çay qaşığına qədər şəkər ehtiva edə bilər ki, bu da bədənə əlavə enerji yükü və qan şəkərinin sürətli yüksəlişi deməkdir.
Gündəlik kofe içkisinə əlavə olunan siroplar təkbaşına 100-200 kalori təşkil edə bilər. Bu da artıq çəki, insulin dirənci və diabet üçün ciddi risk yaradır. pizza mizza
Bununla yanaşı, şəkərli içkilər dəriyə də mənfi təsir edir. Sızanaqlar, iltihablı dəri problemləri və enerji dalğalanmaları siroplu kofenin nəticələri arasında göstərilir.
Mütəxəssislər xüsusilə gənclərə siroplardan istifadədə ehtiyatlı olmağı və daha sağlam alternativlərə üstünlük verməyi tövsiyə edirlər. Məsələn, qəhvəyə darçın və ya vanil tozu əlavə etmək həm dad, həm də sağlamlıq baxımından daha təhlükəsiz sayılır. Süd yerinə isə badam və ya yulaf südü seçmək tövsiyə olunur.
Ən yaxşısı isə bəzək-düzəksiz, sadə bir espresso və ya qara kofedir.
Qısacası, bir fincan kofe ilə həyatın dadını çıxarmaq istəyənlər – siroplu təhlükəyə diqqət edin! Şirin dadın arxasında acı nəticələr gizlənə bilər./Yenisabah.az
