Həkim: “…bu cəhdlər dünyanı böyük fəlakətə sürükləyə bilər”
Xəbər verdiyimiz kimi, türkiyəli professor Oytun Erbaş ötən gün verdiyi açıqlaması ilə müzakirələrə səbəb olub.
Belə ki, o, xəbərdarlıq edib ki, dünyanı 2-5 il ərzində qorxunc pandemiya gözləyir.
Onun sözlərinə görə, pandemiya nəticəsində dəhşətli ölüm halları baş verəcək: “Dünyanı pis günlər gözləyir. Hər iki nəfərdən biri həyatda qalmayacaq. Çox böyük ölüm faizi müşahidə ediləcək” – Erbaş əlavə edib.
Bundan əvvəl də tanınmış şəxslərin bənzər açıqlamalarının şahidi olmuşduq. Dünya milyarderi Bill Qeyts qorxunc bir pandemiyanın olacağını proqnozlaşdırmışdı.
Bundan sonra isə Ümumdünya Səhiyyə Təşkilatının (ÜST) baş direktoru Tedros Adhanom Qebreyesus da təhlükəli bir virusun olacağını və dünya səhiyyəsinin arxayın olmaması üçün xəbərdarlıq etmişdi.
Növbəti pandemiyanın qrip infeksiyasından olacağını deyən həkimlər də var. Bəzi mütəxəssislər isə qeyd edir ki, tez bir zamanda pandemiyanın baş verməsi mümkün deyil. Çünki tarixən pandemiyalar arasında xeyli müddət fərq olub. Yaxın beş ildə növbəti pandemiyanın olması ilə bağlı proqnozlar virusun süni şəkildə yayılacağı ehtimallarını da artırır.
Bakı Ağrı Klinikasının baş həkimi Zülfüqar Yusifov Musavat.com-a mövzu ilə bağlı belə şərh verib:
“Son vaxtlar bu kimi açıqlamalara tez-tez rast gəlirik. Bu ehtimallar müəyyən əsaslara söykənir. Qloballaşan dünyada mübarizə artıq tamam fərqli bir müstəviyə keçib. Hətta böyük güclər arasında baş verən mübarizələrdə də müxtəlif üsullardan istifadə edilir. Məsələn, bu gün nüvə silahına malik ölkələrin bir-birinə qalib gəlməsi çətinləşib. Bəzi hallarda isə müharibənin dolayı yollarla davam etdiyini müşahidə edirik. Bu dolayı müharibələrdən biri də bioloji müharibələr ola bilər. Belə müharibələrə cəhdlər mümkündür və bu cəhdlər dünya miqyasında böyük fəsadlara səbəb ola bilər. Hazırkı dövrdə insanların hərəkətliliyi son dərəcə artıb. Belə bir vəziyyətdə yeni pandemiyanın başlanması halında onun yayılma arealı və təsirləri olduqca geniş və ağır ola bilər”.
Həkim qeyd edir ki, bu ehtimalların ortaya çıxmasının digər səbəblərindən biri də böyük iqtisadi maraqlardır: “Bu maraqlar da müəyyən qüvvələri belə prosesləri təhrik etməyə sövq edə bilər. Ümumiyyətlə, bəzi alimlərin qeyd etdiyi kimi, rəqəmsallaşmaya keçidin sistemləşməsi üçün də bu cür cəhdlərə yol verən güclər ola bilər. COVID dövründə bunun şahidi olduq – insanlar evdə oturarkən daha çox onlayn fəaliyyətə başladılar. Bu isə dünyada ümumi nəzarətin həyata keçirilməsi üçün əlavə imkanlar yaratdı. Çünki qlobal nəzarətin təmin olunması yalnız tam rəqəmsallaşmış, mərkəzdən idarə olunan sistemlər vasitəsilə mümkündür. Belə bir pandemiya, insanları evdə qalmağa məcbur etməklə, rəqəmsallaşmaya sürətli keçidi təmin edə və bütün sistemlərin mərkəzləşdirilməsinə zəmin yarada bilər.
İqtisadi maraqlar deyərkən, burada böyük gəlir əldə edən güclər nəzərdə tutulur. Söhbət onlarla milyard dollardan gedir. Pandemiya dövründə tətbiq olunan dərman preparatları və tibbi sənaye bu prosesə cəlb olundu. Əlbəttə, peyvənd biznesini də yaddan çıxarmaq olmaz. Milyardlarla insanın peyvənd olunması – bu prosesin hansı rəqəmlərlə ifadə olunduğunu təsəvvür etmək çətin deyil. Bütün bunlar pandemiya həvəskarlarını belə destruktiv addımlar atmağa sövq edə bilər. Lakin mən düşünürəm ki, bütün bunlar yalnız ehtimallardır. Bu cür niyyətlər dünyanın sonunu gətirə biləcək təhlükəli addımlar olsa da, dünyanı qoruyacaq güclər də mövcuddur. Ayrı-ayrı ölkələrin səhiyyə sistemləri, vicdanlı insanlar və COVİD-dən əldə etdiyimiz təcrübə var. Ancaq destruktiv meyllər hər zaman mövcud olacaq”.
Afaq Mirayiq,
Musavat.com
