Prezident İlham Əliyev bu gün imzaladığı Sərəncama əsasən Rəşad Fəxrəddin oğlu Aslanov Azərbaycan İtaliyada, eyni zamanda Maltada, San Marinoda fövqəladə və səlahiyyətli səfiri və Azərbaycanın Birləşmiş Millətlər Təşkilatının Ərzaq və Kənd Təsərrüfatı Təşkilatı, Ümumdünya Ərzaq Proqramı, Kənd Təsərrüfatının İnkişafı üzrə Beynəlxalq Fondu yanında daimi nümayəndəsi vəzifələrindən geri çağırılıb.
Dövlət başçısının digər Sərəncamı ilə Rəşad Aslanov Azərbaycanın Türkiyədəki səfiri vəzifəsinə təyin edilib.
Musavat.com rəsmi mənbələrə istinadən diplomatın dosyesini təqdim edir:
Rəşad Aslanov 13 oktyabr 1977-ci ildə anadan olub. Bakı Dövlət Universitetinin Beynəlxalq Münasibətlər və Beynəlxalq Hüquq Fakültəsinin beynəlxalq hüquq üzrə məzunudur.
Böyük Britaniyada İnsan Hüquqları, Hüquq və Təcrübə üzrə Peşəkar İnkişaf Kursu keçib.
Diplomatik fəaliyyətə 2011-ci ildə Xarici İşlər Nazirliyində başlayıb.
2004-2008-cü illərdə Azərbaycan Respublikasının İtaliyadakı səfirliyinin üçüncü və ikinci katibi, Azərbaycanın İtaliyanın Roma şəhərində yerləşən BMT Agentlikləri yanında daimi nümayəndəsinin müavini olub.
2011-2016-cı illərdə Azərbaycan XİN-də müxtəlif vəzifələrdə çalışıb.
2016-cı ildə Azərbaycan Respublikasının Argentina Respublikasındakı müvəqqəti işlər vəkili təyin olunub.
2016-2022-ci illərdə Azərbaycan Respublikasının Argentinada, Çilidə, Paraqvayda, Çoxmillətli Boliviya Dövlətində və Uruqvay Şərq Respublikasında fövqəladə və səlahiyyətli səfiri vəzifələrində çalışıb.
2023-cü ildən bu günə qədər Azərbaycan Respublikasının İtaliyadakı, Maltadakı, o cümlədən San Marinodakı fövqəladə və səlahiyyətli səfiri olub. Diplomat eyni zamanda Azərbaycanın Romada yerləşən BMT Agentlikləri yanında (FAO, ÜƏP, IFAD) daimi nümayəndəsi idi.
