Ötən gün mövcud pandemiya şəraiti ilə əlaqədar olaraq, növbəti həftədən etibarən tədrisin təşkili ilə bağlı yeni normaların tətbiqi barədə qərar verilib.
Təhsil Nazirliyinin yaydığı məlumata görə, aprelin 5-dən Bakı, Sumqayıt, Gəncə, Şəki şəhərləri və Abşeron rayonunun ümumi təhsil müəssisələrində tədris və təlim-tərbiyə prosesinin distant (məsafədən) formada təşkili nəzərdə tutulur. Digər şəhər və rayonlarda isə tədris sanitar-gigiyenik tələblərə əməl edilməklə qismən əyani formada davam etdiriləcək.
Dərslər yalnız Azərbaycanda deyil, bir sıra ölkələrdə də distant formada davam etdirilir.
Bəs digər ölkələrdə tədris prosesi necə təşkil edilir?
Aprelin 5-dən Ukraynanın paytaxtı Kiyevdə məktəblər və uşaq bağçaları işləməyəcək, ictimai nəqliyyatdan isə yalnız xüsusi icazəsi olanlar istifadə edə biləcək.
Livanın paytaxtı Beyrut şəhərində isə 1 600-dən çox özəl, 1 256 dövlət məktəbi faəliyyət göstərir ki, birincisində 700 mindən çox şagirdə 59 mindən çox müəllim və 15 min məktəb idarəedici heyəti xidmət göstərir. İkincisində isə 328 min şagirdə 43 500 müəllim dərs keçir. Vəziyyətin ağırlaşacağı və mənfi təsirlərin artacağı halda 1 600 dən çox özəl məktəbin bağlanacağı və məsafədən təhsilə keçəcəyi gözlənilir.
Bundan başqa Avstraliyanın bir çox ştatlarında vəziyyətdən asılı olaraq orta məktəblərin bağlanması və məsafədən təhsilə keçilməsi barədə qərar verilib.
