Azərbaycanda koronavirusa yoluxanların və ölənlərin sayı artma dinamikası ilə davam edir. Yoluxma və ölüm halları artdığına görə bəzi məktəblər distan təhsilə keçib. Əksər məktəblilər internet problemi olduğuna görə şagirdlər və müəllimlər onlayn dərslərə qoşulmaqda çətinlik çəkirlər. Pandemiyanın da nə zaman bitəcəyi məlum deyil. Bu gün təklif olunan məsələlərdən biri də məktəblilər və müəllimlər üçün internetin pulsuz olmasıdır. Maraqlıdır bu təklif nə qədər həqiqəti əks etdirir, ümumiyyətlə müəllimlər və şagirdlər üçün internetin pulsuz olması mümkündürmü?
Bununla bağlı Sonxeber.az-a danışan deputat Azər Badamov bildirib ki, pandemiya ilə əlaqədar məktəblərdə təhsil distant şəkildə tədris olunur:
“Birinci növbədə biz düşünməliyik ki, distant təhsildən şagirdlərimiz hansı səviyyədə yararlana bilirlər. Təbii ki, ölkə daxilində genişzolaqlı internet təminatı tam şəkildə təmin olunmayıb. Elə kəndlər vardır ki, ümumiyyətlə genişzolaqlı internet yoxdur və yaxud bütün yaşayış məntəqlərinin sakinlərinin hamısı genişzolaqlı internetdən yararlana bilmirlər. Belə olan halda o bölgələrin şagirdləri təhsildən kənarda qalırlar. Düzdür, mobil internetlə ölkəmizin bütün əraziləri təmin olunmayıb. Amma distant tədrisdə bütün şagirdlərin mobil internetdən yaralanmaq imkanları məhduddur. Yəni, saatlarla tədris prosesində çoxlu meqabaytlar tələb olunur ki, buna da bütün valideynlərin imkanı çatmır. Ona görə də distant təhsilin keyfiyyəti yüksək olacağını düşünmürəm”.
Deputat qeyd edib ki, çıxış yolu isə birinci növbədə müvafiq qurum tərəfindən şagirdlər üçün xüsusi mobil internet paketinin tətbiq olunmasıdır:
“Belə xüsusi internet paketinin ancaq distant təhsilə çıxışı olmalıdır və şagirdlər üçün pulsuz təqdim olunmalıdır. Çünki bizdə orta təhsil pulsuz olduğundan müvafiq qurum təhsilin distant keçirildiyi müddətdə əldə etdiyi qənaətlər hesabına şagirdlər üçün ünvanlanmış xüsusi distant internet paketinin maliyyələşdirilməsi mümkündür. Digər tərəfdən isə ümumiyyətlə məktəblərin qapadılmasına ehtiyac görmürəm. Çünki, məktəblərdə pandemiya ilə bağlı qoruyucu tədbirlər yüksək səviyyədə gözlənilir. Pedoqji işçilərin koronavirusa yoluxmasını isə əsasən məktəbdən kənarda baş verdiyini düşnürəm. Biz bunu təbii qəbul etməliyik və xəstələnən müəllimləri sağlam müəllimlər əvəz etməklə əyani təhsili davam etdirmək mümkündür. Onu da qeyd edim ki, müəllimlərin 50%-dən çoxu artıq peyvəndlənib. Biz ilk növbədə təcilli şəkildə müəllimlərin peyvəndlənməsini başa çatdırmalıyıq ki, bütün müəllimlər normal şəkildə tədrisə davam etdirə bilsinlər. Digər tərəfdən isə iki aydan sonra məktəblərdə yay tətili başlayır. Yenə üç ay şagirdlər məktəbdən uzaq düşəcəklər. Ona görə də düşünrəm ki, heç nəyə baxmadan biz əyani təhsili bərpa etməliyik”.
