Azərbaycan Prezidenti Qarabağın ölkənin iqtisadiyyatı və maddi-texniki təminatında mühüm yer tutacağını bildirib – Style International
Bu gün aylıq Style International qəzetinin rəqəmsal versiyası olan İspan nəşrində AZƏRTAC-ın İspaniyadakı xüsusi müxbiri Nigar Cəfərlinin “Azərbaycan Prezidenti Qarabağın ölkə iqtisadiyyatı və logistikasında mühüm yer tutacağını bildirib” başlıqlı məqaləsi dərc edilib (https://www.styleinternational.es/ el-presidente-de-azerbaiyan-afirma-que-karabaj-ocupara-un-lugar-importante-en-su-Economyia-y-sector-logistico /).
ARANTV.AZ xəbər verir ki, məqalə dünyanın aparıcı beyin mərkəzlərinin nümayəndələrinin iştirakı ilə Azərbaycan Diplomatik Akademiyasında keçirilən “Cənubi Qafqaza yeni baxış: münaqişədən sonra inkişaf və əməkdaşlıq” beynəlxalq konfransına həsr edilib.
Məqalədə Prezident İlham Əliyevin beynəlxalq konfransdakı çıxışı zamanı torpaqlarımızın 30 ilə yaxın işğal altında olduğunu və Ermənistan ordusu tərəfindən törədilmiş vəhşilikləri unuda bilməyəcəyimizi vurğuladığı qeyd edilib.
İspan nəşrində qeyd olunub ki, Prezident İlham Əliyev münaqişədən sonrakı dövrdə iqtisadi sahədə həyata keçirilən layihələrə müraciət edərək, Qarabağın ölkə iqtisadiyyatında mühüm roluna, maliyyə siyasəti və xarici investorlar üçün yeni perspektivlərə diqqət çəkib. O, həmçinin üç aeroportun və dəmir yollarının birləşdirilməsi üzrə işlərin başlandığını və Zəngilanın regional logistika mərkəzinə çevrilməsi layihəsini qeyd edib.
Style İnternational, biznesin, tikinti sektorunun, ümumi iqtisadiyyatın inkişafına xidmət edəcək, yeni iş yerləri açacaq, yeni imkanlar yaradacaq, aqrar sektoru dəstəkləyəcək Azərbaycan hökuməti tərəfindən Vətən müharibəsindən əvvəl hazırlanmış və böyük investisiyalar tələb edən ortamüddətli və uzunmüddətli inkişaf strategiyası barədə də diqqətə çatdırır.
Məqalədə göstərilir ki, Azərbaycan Dünya Bankının “Doing Business” hesabatının reytinqində 28-ci yerə keçib. Qeyd edilib ki, Azərbaycanda yaxşı biznes mühiti və dəyərli insan kapitalı var. Azərbaycan, xarici borcları ÜDM-in 10 faizinə və yoxsulluğun səviyyəsini 5 faizə endirərək, dünyada ən yaxşı nəticə əldə edib.
Diqqətə çatdırılır ki, söhbət iki xalqın dinc yanaşı yaşaması üçün çox mühüm körpülərin qurulmasından gedirsə, İlham Əliyev liderlərin iradəsinə və siyasi müdrikliyinə böyük əhəmiyyət verir. Məlum olub ki, Azərbaycanın münaqişə səhifəsini çevirmək niyyətinə və Ermənistanla sülh sazişi imzalamağa hazır olmasına baxmayaraq, Ermənistan hakimiyyəti aqressiv mövqeyini saxlayır. Lakin gələcəyə baxan və sabitliyi ölkənin inkişafı üçün mühüm zəmin hesab edən şəxs kimi, prezident əməkdaşlığın qurulmasına hazır olduğunu bildirib.
İspan nəşrində vurğulanıb ki, müharibə başa çatıb və bu gün Qarabağın dünyanın ən gözəl regionlarından birinə çevrilməsi üçün Cənubi Qafqazda yeni inkişaf və əməkdaşlıq strategiyasının formalaşdırılmasına ehtiyac yaranıb.
