Rafiz Hüseynov Şuşa uğrunda gedən döyüşlərdə şəhid olub
ARANTV.AZ Real TV-ə istinadən bildirir ki, Rafizin ən böyük arzusu işğalda olan torpaqların azad edilməsində iştirak etmək idi. Elə bu arzuyla da hərbiyə yollanaraq ordumuzun sıralarına qatıldı.
Rafiz Hüseynov 12 oktyabr 2000-ci ildə Gədəbəy rayonunda Şahdağın ətəyində yerləşən Şahdağ kəndində doğulub.
Oxuduğu illərdə daim nizam-intizamı ilə seçilən Rafiz Respublika üzrə keçirilən “Şahin” hərbi idman yarışlarına qatılar, çox zaman da qalib gələrdi.
Müəllimləri onun sədasını hansısa ali məktəbdən gözləsələr də, Rafiz təhsili deyil, hərbini seçib. İşğalda olan torpaqların azadlığında iştirak etmək Rafizin ən böyük arzusu idi.
Elə bu arzuyla da 2019-cu ildə hərbi xidmətə yollanıb. 27 sentyabrdan Xüsusi təyinatlı əsgərlərin sırasında döyüşlərə qatılaraq torpaqların azadlığı uğrunda mübarizəyə qoşulub. 28 oktyabrda Şuşa uğrunda döyüşlərdə şəhid olub.
Torpaqları azad edən, xalqına firavan ölkə qoyaraq ölümsüzlüyə üz tutan Şəhidimiz ölümündən sonra”Vətən uğrunda”, “Cəsur döyüşçü” medalları ilə təltiflənib.
Ruhun şad, yerin Cənnət olsun.
