Tovuz rayonunda narkotik alan və satan şəxslər saxlanılıb.
Daxili İşlər Nazirliyinin Mətbuat Xidmətinin Gəncə regional qrupundan verilən məlumata görə, Tovuz Rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində qanunsuz olaraq narkotik vasitə əldə edib saxlamaqda şübhəli bilinən Kənan Hümbətov və Azər Seyidov saxlanılaraq polis şöbəsinə gətirilib.
Onların üzərinə baxış keçirilən zaman K.Hümbətovdan narkotik maddə olan metamfetamin və qurudulmuş marixuana, A.Seyidovdan isə heroin aşkar edilərək götürülüb. Saxlanılan şəxslərin ətrafında keçirilən istintaq-əməliyyat tədbirləri nəticəsində həmin şəxslərə narkotik maddəni satan şəxsin kimliyi bəlli olub.
Belə ki, şübhəli şəxslər ifadələrində narkotik maddəni Samir adlı şəxsdən aldıqlarını bildiriblər. Davam etdirilən əməliyyat-axtarış tədbirləri nəticəsində qanunsuz olaraq satış məqsədi ilə narkotik maddə əldə edib saxlamaqda şübhəli bilinən rayon sakini Samir Hacıyev saxlanılıb.
Üzərindən narkotik maddə heroin aşkar edilən S.Hacıyevin yaşadığı fərdi yaşayış evindən isə 9 ədəd müxtəlif bükümlərdə metamfetamin, 10 ədəd müxtəlif bükümdə heroin, metadon həbləri və tiryək aşkar edilərək götürülüb.
Bundan başqa RPŞ əməkdaşlarının keçirdikləri digər bir əməliyyat-axtarış tədbirləri nəticəsində qanunsuz olaraq satış məqsədi ilə narkotik maddə əldə edib saxlamaqda şübhəli bilinən rayon sakini Ənvər Abuzərov saxlanılıb.
Üzərindən narkotik vasitə olan qurudulmuş marixuana aşkar edilən Ə.Abuzərovun və yaşadığı evdən isə müxtəlif bükümlərdə və kibrit qutularında olan narkotik vasitə olan qurudulmuş marixuana, 1 ədəd müvafiq sənədləri olmayan ov tüfəngi, 2 ədəd həmin tüfəngə aid patron, 27 ədəd güllə başlığı, 6 ədəd pnevmatik silaha aid patron, 1 ədəd 5,45 mm-li avtomat patronu və 1 ədəd bıçaq aşkar edilərək götürülüb
Saxlanılan şəxslər maddi sübutlarla birlikdə istintaqa təhvil verilib, araşdırmalar davam etdirilir.
