Rəşad Tağıyev- “Yaradıcısı Ümummilli Lider olan Yeni Azərbaycan Partiyasının fəaliyyətində Heydər Əliyevin ideya və arzuları yaşayır”
Şəmkir Rayon İcra Hakimiyyətinin başçısı Rəşad Tağıyev RİH əməkdaşları, idarə, müəssisə, təşkilat rəhbərlərinin iştirak ilə YAP Şəmkir Rayon Təşkilatının yenidən sədri təyin olunmuş Fəxrəddin Vəliyev və rayon ictimaiyyətinin nümayəndələri ilə görüş keçirib.
Tədbirdən əvvəl görüş iştirakçıları Şəmkir şəhərinin mərkəzində yerləşən Ulu Öndər Heydər Əliyevin abidəsini ziyarət edib, abidə kompleksi önünə tər çiçək dəstələri düzüblər.
Görüşdə çıxış edən RİH başçısı Rəşad Tağıyev bildirib ki, Yeni Azərbaycan Partiyasının qısa müddətdə xalqın sevimli partiyasına çevrilməsinin tək bir səbəbi var idi – xalqın partiyanın qurucusuna olan sevgisi, inamı. Çünki zaman göstərdi ki, xalq Heydər Əliyevə arxalanmaqla, onun ətrafında sıx birləşməklə öz gələcəyini təmin etmiş oldu. Ulu Öndərin “Yeni Azərbaycan Partiyası müstəqil Azərbaycanı müstəqillik yolunda inkişaf etdirməyə qadir bir partiyadır” sözünün həqiqət olduğunu da tarix göstərdi: “Yaradıcısı Ümummilli Lider olan Yeni Azərbaycan Partiyasının fəaliyyətində Heydər Əliyevin ideya və arzuları yaşayır. Qarabağ Zəfərindən sonra yaranmış yeni reallıqlar fonunda Azərbaycan partiyanın Sədri, Prezident, Müzəffər Ali Baş Komandan İlham Əliyevin rəhbərliyi ilə parlaq gələcəyə doğru daha inamla irəliləyəcək”.
Fəxrəddin Vəliyevi yenidən YAP Şəmkir rayon təşkilatının sədri təyin olunması münasibətilə təbrik edən Rəşad Tağıyev Şəmkir RİH-də çalışdığı müddətdə rayonun ictimai-siyasi, sosial-iqtisadi həyatında uzun müddətli səmərəli fəaliyyətinə görə təşəkkür edib, yeni işində uğurlar arzulayıb.
Fəxrəddin Vəliyev çıxış edərək, Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevə və partiya rəhbərliyinə təşəkkürünü bildirib, bu etimadı layiqincə doğruldacağını vurğulayıb.
Tədbirdə çıxış edənlər də yeni təyinat münasibətilə Fəxrəddin Vəliyevi təbrik edib, bu yolda ona müvəffəqiyyətlər arzulayıblar.
