Balakən rayonunun heyvandarları 2022-ci ilin birinci rübünü uğurlu göstəricilərlə başa vurublar. Bu ilin yanvar-mart aylarında rayonun fərdi sahibkar, ailə kəndli və ev təsərrüfatlarında, həmçinin kənd təsərrüfatı müəssisələrində 1263,6 ton diri çəkidə ət, 5 min 569,3 ton süd, 2 milyon 721 min ədəd yumurta istehsal olunub. Ötən ilin müvafiq dövrü ilə müqayisədə rayonda ət istehsalı 30,3 ton, süd istehsalı 42,5 ton, yumurta istehsalı isə 17 min ədəd artıb.
Bu barədə AZƏRTAC-ın bölgə müxbirinə Balakən Rayon Statistika İdarəsindən məlumat verilib.
Qurumdan bildirilib ki, istehsal olunan diri çəkidə ətin 1259,9 tonu, südün isə 5 min 536,6 tonu fərdi sahibkar, ailə kəndli və ev təsərrüfatlarının payına düşür. Rayonda fəaliyyət göstərən kənd təsərrüfatı müəssisələrində isə üç ayda 10,7 ton ət, 32,7 ton süd istehsal olunub.
Heyvandarlıq məhsulları istehsalının artmasında cins maldarlığın inkişafı ilə bağlı həyata keçirilən tədbirlər xüsusi rol oynayıb.
